Items filtered by date: Thursday, 22 August 2019

Julio Freitas, eis membru Dewan Perwakilan Rakyat Daerah (DPRD) Kabupaten Lautem, konfirma sa ida maka faluk Mariana Marques dehan nune'e nia rekoñese, iha momentu ne'eba, nia taa Angelo da Costa tanba iha presaun husi Governu no militar nia okos. Ba www.tempotimor.com iha intervista ida via telemovel, Julio dehan momentu ne'e obrigatoriamente hodi taa duni Angelo nia kakorok. Tuir mai testemuña husi Julio Freitas.

 

“Ha'u mak tesi Angelo da Costa nia kakorok. Mas, nia lamate ida. Tanba, ha'u  laiha experiensia hodi oho ema. Entaun, ha'u ta’a nia kakorok, nia monu liu. Tanba bapa sira kastigu semana ida la fó ai-han. Labarik ida naran Victor Ximenes mak ba sona fali mós (Angelo) nia la mate ida. Depois, entrega ba familia atu hakoi. Maibé, Angelo ida be ha'u sona ne’e sidauk mate. Maibé, nia familia hakoi de'it. Nia familia mak hakoi mesak. La'ós bapak mak hakoi. Ema nain lima ami oho ne’e, Governo Indonézia mak organiza. Ha'u tenki oho duni. Tanba hetan obrigasaun husi Indonézia sira nian. Ita kan boneka Indonézia nian ona. Ha'u mós ema Katóliku ida. Maibé, tanba situasaun mak obriga.” 

 

Tanbasá nu'udar membru DPRD ida, senor Julio Fretias obriga aan atu oho ema? 

 

“Ha'u lahatene. Ba husu bapak sira. Veteranos sira uluk ne’e mak hatene. Ha'u mós  lahatene. Ha'u ho Angelo laiha problema privadu. Di'ak-liu ba buka DANDIM hodi husu ba nia. Tanbasá Claudio Vieira uluk sei moris, imi toba be imi la husu nia. Foin mak husu ha'u. Ha'u mós presta ona deklarasaun iha ONU no CAVR diak liu ba buka dokumentus iha CAVR, ONU hatene hotu. Diak liu ita mai mak ita ko'alia. Ha'u taka telefone agora,” Julio Freitas afirma hodi hamate ninia telemovel.

JEOGRAFIKÁMENTE, Lospalos munisípiu ida ne'ebé hadulas ho ai-laran tuan, ne'ebé fasil ba gerrilleirus halo movimentu ba mai. Situasaun jeografiká ida ne'e mós halo área Lospalos nu'udar armazém ai-han ba gerrilleirus sira. Iha área ida ne'e maek, nuu, kumbili no ai-han seluk tan, fasil atu gerrilleirus sira hetan.