Iha enkontru ne’ebé maka hala’o kuaze oras rua nia laran ne’e, reprezentante komunidade Oe-Cusse sira aproveita oportunidade atu hato’o sira-nia preokupasaun hirak-ne’ebé sira hasoru.

Portavoz ba komunidade Oe-cussi, Sr. Agustinho da Costa “Fitun Bot”, informa katak, projetu hirak hanesan konstrusaun ótel luxu Oeupu, alargamentu istrada ne’ebé autoridade lokal ZEESM hala’o ne’e la hala’o liúhosi konsulta ho rai-nain sira. Komunidade-sira ne’ebe afetadu senti katak, indeminizasaun ne’ebe sira simu la justu no la permiti sira harii fila-fali sira nian uma ho material konstrusaun ne’ebe sira simu ona. Osan atu selu badain la to’o no material-sira ne’e, hanesan simenti, sei sai fatuk tanba sira laiha kbiit atu harii uma foun. “Fitun Bot” lamenta situasaun umakain liu 180 ne’ebe hetan prejuizu durante fase konstrusaun ida ne’e. Nia dehan katak ema sira ne’ebe lakon sira nia uma, “agora moris fila fali iha terpal nian okos”.

Membru komunidade Oe-cussi sira-ne’e mós preokupa ho sira nian fonte rendimentu, tanba ho planu konstrusaun sistema irrigasaun la permiti sira kuda sira nian hare durante tinan tolu nian laran.

Maski Xefe Kaza Sivil Rui Gomes apresia onestidade no frontalidade reprezentante-sira komunidade Oe-Cusse nian, nia promete haruka kedas asesór juridiku, Dr. José António, hodi hala’o levantamentu liu hosi halibur informasaun klean liu tan, no rona mós hosi parte responsável-sira projetu ZEESM nian molok prepara relatóriu ida ba Sua Eselensia Prezidenti-Repúblika, Taur Matan Ruak.

Rui Gomes mós enkoraja nafatin diálogu entre responsável-sira projetu nian ho komunidade atu buka solusaun diak ba parte hotu.

Iha sorumutuk ho reprezentante-sira komunidade Oe-Cusse hamutuk ema nain ruanulu ne’e, marka mós prezensa Xefe Kaza Militar, Koronel Trix no asesór-sira juridiku nian, Dr. Tiago Sarmento.