Print this page

Forsa Indonézia Na'in-13 'Mout' iha RAEOA

By January 29, 2021 1731

Tempotimor (Dili)- Membru husi forsa Tentara Nasional Indonesia (TNI) hamutuk na'in-13 mout iha tasi Rejiaun Administrativu Espesiál Oecusse-Ambeno (RAEOA) tanba laloran tasi ne'ebé akompaña ho anin-boot halo sira la konsege ba to'o iha territóriu Indonézia nian.

Portavós Komandu Jerál PNTL, Superintendente Xefe Arnaldo de Araújo haktuir, situasaun ne'e akontese iha loron 27 fulan-janeiru 2021, maizumenus iha tuku 13:15 meudia, bainhira sai husi sira nia postu seguransa iha Fatuk Sinai, Indonézia nian atu foti sira-nia sasan iha Postu administrativu Oepolo, Kupaun, atu fila fali ba sira nia postu maka mosu anin no laloran tasi boot hodi impede sira iha tasi klaran, inklui laloran tasi baku sira fali-fali mai iha área RAEOA, sub-rejiaun Nitibe, iha bairru Kalbulubu, aldeia Citrana, suku Bene-Ufe.

"Akontese situasaun balu ne'ebé maka ita- nia kolega sira husi TNI hamutuk sira na'in-13, sira-ne'ebé maka husi fronteira iha foho Sinai, sira ho sira-nia spead boot ne'e atu mai hola sira- nia sasan iha kecamatan Oepoli, ne'ebé sira hola tiha, atu fila-fali ba foho Sinai laloran tasi boot, baku sira mai tama to'o iha área Citrana", nia informa ba jornalista sira, iha Kaikoli, sesta (29/01).

Nia dehan, hafoin akontesimentu, Komandu PNTL RAEOA, eskuadra Citrana, servisu hamutuk ho UPF ba foti sira-nia identidade hodi kontaktu ba sira- nia konsuladu ne'ebé destaka iha Oekussi, halo tiha koordenasaun di'ak hodi entrega hikas forsa Indonézia na'in-13 ne'e.

"Ida-ne'e mak durante ne'e kooperasaun di'ak ho TNI iha fronteira, buat sira ne'e bele akontese hanesan ne'e, maibé buat hotu la'o diak no sira fila-fali ba sira-nia fatin ho di'ak iha oras 17:50. Buat hotu la'o di'ak no kontroladu, laiha buat ida mak akontese", informa nia.

Arnaldo fó-sai katak, forsa Indonézia na'in-13 ne'e la'os tama ilegal, maibé ida ne'e hanesan asidente ida ne'ebé kauza husi anin no laloran tasi boot.

"Sira mai la uza farda, la uza buat ida, no sira mós agradese, tanba servisu iha fronteira ne'e iha koordenasaun buat hotu di'ak", dehan nia.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com