Print this page

Governu Dili Entrega Orsamentu Tokon $29 Ba RAEOA Hodi Jere Rasik

By January 21, 2021 1981
Vise-Ministra Finansas, Sara Lobo Brites iha podium ko'alia ba Jornalista sira Palasiu Governu Vise-Ministra Finansas, Sara Lobo Brites iha podium ko'alia ba Jornalista sira Palasiu Governu Foto Arkivu

Tempotimor (Díli)- Governu liu husi Ministériu Finansas halo akordu ho Rejiaun Administrativa Espesiál Oecusse Ambenu (RAEOA) hodi entrega orsamentu tokon $29 atu jere rasik.

Vise-Ministra Finansas, Sara Lobo Brites relata, orsamentu ne'ebé fó ba RAEOA atu jere rasik ne'e, ba tinan ida nian.

"Ministériu hamutuk ho autoridade RAEOA halo lansamentu ba programa rua, primeiru asina protokolu entre Ministériu Finansas ho RAEOA, hodi permite transferénsia apoiu orsamentu ne'ebé mak governu sentrál fó ba RAEOA, hodi finansia orsamentu RAEOA nian, ho montante $29, 243 milloens ne'ebé mak apoiu husi governu sentrál, ne'ebé orsamentu RAEOA nian totál $127 milloens, ne'ebé nia balansu ne'e sei konkore husi saldo RAEO nian rasik", Nia informa iha edifísiu Ministériu Finansas Aitarak-laran, kinta (21/01/21).

Nia hatutan, Programa daruak mak ligasaun sistema, nune'e lansamentu ohin, RAEOA nia ekipa husi ohin ba oin, sei ezekuta rasik sira nia orsamentu liu-husi sistema.

Nia esplika, sistema ne'ebé RAEOA asesa ezatamente hanesan ho governu sentrál, tantu ajénsia autónoma no munisípiu sira asesa.

"Sira sei hahú prosesu husi kompromísiu halo obrigasoins jere sira nia aprovizionamentu kontratu to'o iha pagamentu banku ne'ebé sira-nia osan rai ba", dehan Nia

Sara Lobo haktuir, Ministru Finansas, Rui Gomes mos, hato'o ona katak, entrega orsamentu ba RAEOA jere rasik, ne'e hanesan pasu ou marka importante ba governu.

"Sr. Ministru mos ohin hato'o ona ne'e marka importante ida mai iha governu, hodi promove nafatin melloramentu iha jestaun Finansas Públikas, hodi nune'e ezijénsia husi públiku no orgaun fiskalizadór sira, hanesan parlamentu, tribunál bele asesu direitamente no halo akompañamentu ba ezekusaun iha governu sentrál nomos iha autoridade RAEOA", tenik Nia

Nia afirma, orsamentu ne'ebé aprova husi parlamentu nasionál ba RAEOA ne'e ba tinan ida, nune'e sei halo transferénsia kada trimestre.

"Tuir akordu ne'ebé mak Ministériu Finansas ho RAEOA konkorda transferénsia orsamentu ba tinan ida, mak orsamentu ne'ebé aprova husi parlamentu ba tinan ida, purtantu $29 milloens ne'e sei halo trimestre haat, entaun sei transfere fulan tolu-tolu, primeiru trimestre, segundu trimestre, terseiru trimestre to'o kuartu trimestre", Nia esplika. (*)

Rate this item
(1 Vote)
Last modified on Thursday, 21 January 2021 14:58
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items