Tuir informasaun, iha Timor-oan na’in 25 ne’ebé daudauk ne’e hela iha kuarentena obrigatoriu. Sidadaun TL hirak ne’e tama illegal liu husi fronteira RAEOA.
Sekretária Rejional Adjuntu Prezidente Autoridade Reforsa Institusional, RAEOA, Leonia Monteiro hatete, husi total sidadaun TL ne’ebé tama-sai illegal iha Oekusse, balun sei prosesa hafoin kumpre kuarentena.
"Kuandu ema sira ne'e mai ilegal husi fronteira ami tenta atu buka hatene, sira ne'ebé dokumentu la kompletu tenke kumpri regras ne'ebé ita-nia estadu kria ona," dehan Leonia iha Parlamentu Nasional Dili, Kuarta (30/9).
Ba sidadaun Indonezia ne’ebé tama illegal iha RAEOA, nia dehan, autoridade sira haruka sai fali kedas ba Indonezia.
“(Sidadaun Indonezia) Labele tama iha Oekusse tanba agora dadaun iha Kupang mós komesa afeita maka’as pandemia Covid-19,” dehan nia.
Entertantu, nia informa autoridade mós koordena no halo levantamentu ona ba fatin ne'ebé atu establese postu integradu seguransa.