Ministru Prezidensial Konsellu Ministru, Fidelis Manuel Leite Magalhães hateten, entrega prosesu Ró Haksolok ba fali RAEOA atu bele kontinua hala'o ninia prosesu tanba, antes ne'e prosesu hotu governu sentrál mak toma konta.
"Projetu ne'e iha rezolusaun atu transforma fali prosesu hotu ba RAEOA tanba, antes ne'e prosesu Ró Haksolok iha governu sentrál. Agora governu sentrál fó fali ba iha RAEOA atu bele lori prosesu ne'e ba oin", dehan nia, hafoin reuniaun Konsellu Ministru, iha Palásiu Governu, Kuarta (8/7).
Nia dehan, governu sentrál ninia kompeténsia ba prosesu Ró Haksolok karik husi RAEOA solusita téknika ruma governu fó bainhira solisita.
"RAEOA ne'e iha autónomu ba patrimóniu administariva finansas, entaun prosesu konstrusaun Ró Haksolok la presiza hela iha Governu sentrál", tenik Nia.
Projetu rezolusaun ne'e aprezenta husi Primeiru Ministru, Taur Matan Ruak, hetan ona aprovasaun husi Konsellu Ministru. (*)