PM Taur: Iha Oekusse Laiha CNRT, FRETILIN, PLP, KHUNTO

PM Taur Matan Ruak asiste PA RAEOA Arsenio Bano asina termu de pose iha palasiu Governu Dili (12/6) PM Taur Matan Ruak asiste PA RAEOA Arsenio Bano asina termu de pose iha palasiu Governu Dili (12/6) Foto Suplai

Tempotimor (Dili)-Primeiru Ministru Taur Matan Ruak husu ba Oekusse-oan sira atu hamutuk hodi halo dezenvolvimentu ba Rejiaun Administrativu Espesial Oekusse-Ambeno ne’ebé sei lidera husi Prezidente Autoridade foun Arsenio Paixão Bano.

PM Taur rekoñese katak politikamente komunidade sira iha Oekusse fahe ba partidu politiku, maibé ida ne’e labele haketak sira.

"Pesoalmente ha'u husu ba povu Atoni-Oekusse hamutuk, ha'u la hatene baikenu, maibé ha'u dehan imi hamutuk. Iha ne'ebá laiha CNRT, FRETILIN, PLP, KHUNTO no seluk tan, maibé ema Atoni de’it," dehan PM hafoin fó pose ba PA RAEOA foun iha palasiu governu, Sesta (12/06).

PM Taur hatutan, Oekusse-oan tenke hamutuk, sai ida de’it, la’os iha ibun de’it maibé aplika iha pratika hodi tau-matan no fó apoiu ba malu.

"Ha'u husu Oekusse-oan hamutuk, ida de'it, la'ós iha ibun de'it maibé liu-liu iha hahalok, hodi tau-matan no apoiu ba sidadaun sira ke ita-boot sira-nia inan-aman, familia rasik. Iha ne'ebá laiha ida númeru um, laiha númeru dois ka númeru tres, hotu-hotu ida mak Atoni no Timoroan," nia husu.

Iha oportunidade ne’e, PM Taur mós ofisialmente entrega Oekusse ba PA RAEOA foun nia liman.

"Señor Prezidente Autoridade, povu Oekusse iha ita-boot nia liman, ita-boot mak kondutór no pilotu, kuandu aviaun riba tuun, ró mout, karreta xoke, responsabilidade ita-boot nian, ami sira apoiu de'it, determinante mak ita-boot," Xefe Governu ne’e dehan.

Rate this item
(1 Vote)
Last modified on Friday, 12 June 2020 18:19
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.