Print this page

Saláriu Funsionáriu RAEOA La'o Normál

By February 10, 2020 2260
Tempotimor (Dili) - Hafoin Prezidente Rejiaun Administrativu Espesiál Oekusi-Ambenu (RAEOA), José Luis Guterres 'Lugu' simu pose, prosesu pagamentu ba funsionáriu sira iha REAOA kontinua la'o normál.

Publikasaun ne'e nu'udar direitu reposta husi Gabinete RAEOA relasiona ho publikasaun www.tempotimor.com, iha loron 10 Fevereiru 2020 ho títulu “Deputadu PN husu Lugu Rezigna aan”, ne'ebé iha parágrafu ikus liu hakerek “Antes ne’e, funsionáriu RAEOA labele simu osan tanba Prezidente Autoridade RAEOA laiha Oekusi hodi bele asina lista pagamentu”.

Tuir karta ne'e, parágrafu iha notìsia ne'e la refleta ba realidade ne’ebé oras ne'e akontese iha Oekusi.

Ho nune’e, Gabinete Prezidente RAEOA hakarak klarifika lia-loos no verdade husi prosesu tomak kona-ba saláriu funsionáriu sira iha Oekusi katak, saláriu tomak ba funsionáriu no kontratadu hotu ne’ebe hala'o servisu iha Oekusi la'o normál hela.

Gabinete Prezidente Autoridade RAEOA hakarak informa ba públiku katak saláriu ba ajente estadu sira ne’ebé hala'o knaar iha Oekusi la'o di'ak hela no laiha impedementu ba prosesu tomak, liuliu kona-ba saláriu.

Atualmente, Gabinete Prezidente Autoridade RAEOA halo hela vários esforsu hodi rezolve obstrusaun ba prosesu pagamentu renumerasaun retroativu ba profesór 116  hahú husi tinan 2011 to'o 2014.

Gabinete Prezidente Autoridade RAEOA hamutuk ho Diresaun Rejional Finansas RAEOA hala'o ona enkontru intensivu ho Diresaun Edukasaun Rejionál Oekusi hodi verifika dokumentu hirak ne’ebé Diresaun Rejional Finansas RAEOA simu iha loron 31 Janeiru 2020 kona-ba pagamentu renumerasaun retroativu ba 116 profesór  iha RAEOA.

Gabinete Prezidente Autoridade RAEOA komunika ona ho Ministériu Edukasaun, Joventude no Desportu (MEJD) hodi bele finaliza prosesu pagamentu renumerasaun ba pesoal 116 haktuir husi lei ne’ebé iha.

Ikus liu, Gabinete Prezidente Autoridade RAEOA rekoñese katak fatór determinante hodi hametin instiuisaun governu iha prosesu kanalizasaun informasaun ba públiku ho efikásia no efesiente maka tenke hato’o lia loos no verdade hodi bele hamosu públiku nia komprensaun ne’ebe loos no klara.
 
 
 
Rate this item
(0 votes)
Last modified on Monday, 10 February 2020 22:54
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items