Print this page

Kompaña “Lulun Biti”, Ro Haksolok Hela Naran

By December 12, 2019 5334
Ro-Ahi Haksolok Ro-Ahi Haksolok Foto: ZEESM

Tempotimor (Dili)-Kompaña Atlantic Eagle ne’ebé konstrui Ro Haksolok laiha ona kbiit atu kontinua konstrusaun ba ro refere, ho nune’e mehi Timor Leste atu iha ro ahi rasik iha posibilidade boot hela de’it mehi no sei la sai realidade.

Prezidente Autoridade Rejiaun Administrativu Espesial Oekusse-Ambeno (RAEOA) José Lui Guterres informa, ro ahi Haksolok daudauk ne’e faila ona tanba kompaña ne’ebé lidera prosesu konstrusaun ro ne’e laiha ona kbiit.

"Ha’u mai hasoru Primeiru Ministru Taur Matan Ruak, kolia kona-ba, iha administrasaun uluk, Konselu Ministru aprova atu sosa ro ahi Haksolok, maibé agora ita akompaña laran triste, tanba ro ne'e bele mai ou bele la mai," deklara J.Luis ba jornalista sira hafoin hasoru-malu ho PM Taur iha Palasiu Governu, Kinta (12/12/19).

J.Luis dehan, empreza ne'ebé konstrui ro Haksolok, Atlantic Eagle, daudauk ne’e hasoru hela problema finanseiru.

“Empreza ne'ebé uluk halo ro ahi Haksolok ne'e fallada tiha ona, nune'e iha prosesu judisiariu ida iha Kuimbra (Portugal) ne'ebá, trata kona-ba emprezariu sira failadu ou la konsege selu responsablidade finanseiru, tribunal bele intervee par haree took hodi tau tan kapital par empreza ne'e bele moris,” informa J.Luis.

Prezidente Autoridade RAEOA ne’e informa, orsamentu ne’ebé TL fó ona ba Atlantic Eagle hodi konstrui ro Haksolok maizumenus millaun $20.

"Sira deve ita barak, tanba ne'e ita sai hanesan kliente importante tebes ba iha rekoperasaun empreza Portugal nian," dehan nia.

Tuir nia, asuntu ro Haksolok ne’e la'os de’it problema RAEOA maibé sai ona asuntu nasionál ba Timor Leste.

Entretantu, tuir artigu ida husi Don Carlos Filipe Ximenes Belo ne’ebé públika iha www.Tatoli.tl iha 28 Maiu 2017 ho titlu “Ro Ahi “Haksolok” (Feleicidade)”, Don Carlos hato’o ninia sasin kona-ba prosesu konstrusaun ro Haksolok.

Iha artigu ne’e, Don Carlos hatete, “Horisehik, loron 26 fulan Maiu, tinan 2017, iha sidade Figueira da Foz, hoprezensa Dr. Mari Alkatiri, Prezidente Autoridade Rejiaun Espesial Oekusse-Ambeno, Vise Ministru Transporte no Komunikasaun Repúblika Demokratika Timor Leste, Eng. Inacio Freitas Moreira, ho tan konvidadus malae mutin no timor-oan, atan ami fó ona bensaun ba ro no Madre Provinsial, Me. Guilhermina hanesan inan sarani; ikus mai, ema tekniku sira husi HAKSOLOK tama tasi laran ho seguransa no susesu. Ema hotu-hotu ne’ebé asiste serimonia ne’ebá, laran kontente tebes, tanba nasuan Timor Leste iha ro ida kapaz, boot no modernu, atu bele halo ligasaun husi tasi, husi Dili ba Oekusse, Ataúro, Indonezia no Australia. Ro “Haksolok” iha kapasidade atu tula ema na’in 377 (tuur ka “sentadas”), no viatura karreta 15.”

Husi informasaun badak ne’ebé Amu Belo hato’o iha tinan rua liu ba, hatudu katak prosesu ro Haksolok ne’e “besik remata” ona.

Iha ninia artigu, Amu Belo mós informa katak ro Haksolok sei halo esperensia iha Portugal durante fulan tolu nia laran, hahú husi fulan Maiu to’o fulan Agostu 2017.

“Ro ahi Haksolok sei halo “experiencia” iha Portugal, no ikus, ho Na’i Maromak nia tulun, sei hakur tasi boot sira, liu ba Timor Leste iha fulan Setembru mai. Kala iha fulan Outubru laran sei to’o Dili. No iha loron 28 fulan Novembru, tinan 2017, sei tama tasi no portu iha sidade Pante Makasar.

Iha artigu ne’e, Amu Belo mós sita total orsamentu ne’ebé governu TL sei gasta ba ro Haksolok hamutuk millaun 13,7 euro.

“Osan barak; maibé, Timor Leste bele hetan ro di’ak ida atu serbi Timor-oan sira,” dehan Amu Belo liu husi nia artigu ne’ebé Tempotimor.com sita husi www.tatoli.tl, Kinta (12/12/2019.

 

Rate this item
(1 Vote)
Last modified on Thursday, 12 December 2019 21:34
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items