MAPKomS: Governu sei La Taka Matan Ba Kondisaun Média

 Ministru Asuntu Parlamentár no Komunikasaun Sosiál (MAPKomS), Francisco Martins da Costa Pereira Jerónimo visita ba Radio Rakambia (23/7) Ministru Asuntu Parlamentár no Komunikasaun Sosiál (MAPKomS), Francisco Martins da Costa Pereira Jerónimo visita ba Radio Rakambia (23/7) Foto Suplai

Tempotimor (Dili) - Ministru Asuntu Parlamentár no Komunikasaun Sosiál (MAPKomS), Francisco Martins da Costa Pereira Jerónimo, nafatin iha vontade hodi vizita média sira iha Timor-Leste, atu haree kondisaun média nian atu rezolve hamutuk tanba média maka fatór ba dezenvolvimentu.

"Ha'u Mai iha ne'e atu fó de'it mensajen ba ita-boot sira katak governu la taka matan ba média sira hotu, tanba média hola parte ba responsabilidade governu" dehan ministru, ba jornalista sira, iha Radio Rakambia, Kinta (23/7).

Tanba ne'e, governu sei la taka matan ba problema atu haree kondisaun sira ne'e oinsá bele fo solusaun, la'ós hotu-hotu 100% maibe pelumenus fó apoiu nafatin atu média eziste no sustentadu nafatin.

Tuir planu ministru nian, radio hotu-hotu kontrola husi Estadu, tan ne'e governu iha hanoin katak ba futuru notísia RTTL.EP nian sai, radio hotu-hotu rede fó mensajen hanesan.

MAPKomS hatutan, di'ak liu tau rede ida para hotu-hotu hanesan atu muda ema nia hanoin labele muda radio ida ba fali radio seluk. Nune’e, radio komunidade sira la foku ona ba notísia, maibé bele halo fali programa seluk hanesan analiza, peskiza no seluk tan.

Molok ne'e, diretóra Radio Rakambia Cristina Belo, agradese tebes ba prezensa Ministru tanba bele hakat aan vizita Radio Rakambia.

"Ami fiar katak ho vizita ida ne'e bele hetan solusaun ba problema ne'ebé ami hasoru, tanba durante ne'e ami hato'o ona proposta ba kompañia internasionál maibé to'o agora seidauk iha rezultadu" dehan nia.

Ne’e duni, espera hodi vizita MAPKomS nian bele buka dalan no solusaun ba problema ne'ebé radio ne’e hasoru. (*)

Rate this item
(0 votes)
Last modified on Saturday, 25 July 2020 10:38
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.