"Ha'u rejista sira-nia preokupasaun, ha'u lori ba Konselu Ministru" dehan Ministru Jerónimo, plenária iha Parlamentu Nasionál, Tersa (21/07.

Molok ne'e, Deputadu Bankada KHUNTO, António Verdial hateten, situasaun ka planu Ministériu Justisa nia politíka atu adita artigu balun iha kódigu penál hodi kriminaliza difamasaun maka sei halo violasaun hasoru Konstituisaun RDTL rasik.

"Inisiativa ne'e maka realiza duni frankamente ita viola ona Konstituisaun RDTL artigu 40 kona-bá liberdade espresaun no informasaun, tanba difamasaun tuir ha'u-nia interpretasaun ne'e ita karakteriza ba kazu sivíl la'ós krime", dehan nia.

Nia hatutan, hanesan reprezentante iha uma fukun ne'e preokupa tebes ho Ministériu Justisa nia politíka ba asuntu ne'e tanba nasaun ne'e Repúblika Demokrátika Timor-Leste, signifika demokratikamente ema hotu iha livre hodi bele hato'o sira-nia preokupasaun.

"Atu kriminaliza defamaun ita tenke haree lai ba artigu 87 kódigu penál, tanba artigu ne'e ko'alia hela kona-ba buat seluk ida, nia refere liu ba ema ne'ebé antes ne'e hatene hela nia segredu depois konta tutan ba ema seluk, buat ida ne'e mak ita hanaran defarsas", tenik nia.

Ne'e duni, tuir nia, solusaun maka Ministériu Justisa labele elemina artigu 87 kódigu penál, nune'e kria uluk Lei Sibernétika no Lei Seguransa Sibernétika hodi kontrola média sosiál sira, hafoin haree ba lei sira seluk hanesan difamasaun no injuria.

"Karik laiha Lei Sibernétika maka ita sei labele halo buat ida hanesan deputadu haree no akompaña ho situasaun jerál espesialmente ema barak tarata demais liu husi média Facebook no WhatsApp, la'ós direta", dehan António.

Bazeia ba deklarasaun ne'e, Deputadu KHUNTO husu bá Governu liuhusi Ministériu Justisa presiza kolobora didiak ho Ministériu Komunikasaun no Transporte, nune'e buka meiu oinsá aproxima Parlamentu Nasionál hamutuk hamosu konsensu ida atu kria uluk  Lei Sibernétika.

Iha fatin hanesan, Deputadu Bankada CNRT, Arão Noé de Jesus hateten, la'ós laiha lei difamasaun no lei proteje, maibe iha kódigu sivíl,  nune'e sé mak sente pejudikadu bele ba keixa karik manan bele hetan indenimizasaun husi ema ne'ebé difama ninia onra.

Deputadu CNRT informa, demokrasia tenke  husik ema nia liberdade espresaun pois sé mak sente pejudikadu ba asaun sira ne'e bele keixa halo asaun prosesu tuir kazu sivíl. (*)