Login to your account

Username *
Password *
Remember Me

MAPKomS Vizita Media: “Labele Sente Mesak, Ha’u ho Imi”

MAPKomS foto hamutuk ho dirijentes no jornalista husi jornal INDEPENDENTE iha kna'ar fatin jornal ne'e iha Hudi Laran Dili (8/7) MAPKomS foto hamutuk ho dirijentes no jornalista husi jornal INDEPENDENTE iha kna'ar fatin jornal ne'e iha Hudi Laran Dili (8/7) Foto Tempo Timor

Tempotimor (Dili)-Ministru Asuntu Parlamentar no Komunikasaun Sosial (MAPKomS) Francisco Jeronimo hala’o vizita ba instituisaun media sira ne’ebé eziste iha Timor-Leste. Ho vizita ne’e, Ministru Jeronimo hakarak hatudu ba instituisaun media katak iha governante ida ne’ebé hamutuk ho media sira.

Ministru Jeronimo hahú nia vizita ba media sira iha Kuarta (09/02). Jornal INDEPENDENTE sai nu’udar instituisaun media imprime dahuluk ne’ebé ministru ne’e vizita.

Iha enkontru badak ho lideransa Jornal INDEPENDENTE no jornalista sira, Ministru Jeronimo hato’o nia razaun hodi hala’o vizita serbisu ba instituisaun media sira.

“Hanesan ministru iha obrigasaun atu mai haree ita-boot sira no fó hanoin katak ita-boot sira labele sente mesak, iha governante ne’ebé mak iha preokupasaun ho ita-boot sira,” dehan Ministru Jeronimo iha edifisiu jornal INDEPENDENTE, Hudi-Laran.

Iha oportunidade ne’e, MAPKomS agradese mós ba esforsu komponente tomak iha jornal INDEPENDENTE hodi dezamina informasaun ba públiku.

“Ami-nia agrade no obrigadu ba ita-boot sira tanba ita-boot sira bele hatutan ona lian estadu nian, governu nian ba fatin hotu-hotu.”

Nia hatutan, ninia vizita ba media sira atu rona media sira-nia hanoin no halerik hodi bele buka meius atu hakaman netik todan ne’ebé instituisaun media sira hasoru durante ne’e.

“Ha’u mai hasoru ita-boot sira, ita-boot sira hato’o preokupasaun, ha’u rona, ha’u fila, ha’u hanoin oinsa par bele fó solusaun ba imi-nia problema sira ne’e, tanba problema ne’e la’os ita mai atu fahe malu osan ka saida, ne’e lae, maibé ita hanoin halo nusa mak atu fó solusaun ne’ebé mak di’ak no bele responde ba ita-boot sira -nia preokupasaun,” dehan ministru ne’e.

Iha fatin hanesan, Diretór Jornal INDEPENDENTE José Sarito Amaral, lori komponente tomak iha jornal INDEPENDENTE agradese ba prezensa MAPKomS.

Sarito hatete, iha ezistensia jornal INDEPENDENTE  durante tinan sia (9) nia laran hasoru difikuldade oioin, liu-liu kestaun rekursu finanseiru no rekursu umanus.

“Ami funda jornal ida ne’e la’os mai ho kapital ida boot maibé mai ho vontade, ho espirítu atu bele oferese notisia ne’ebé kualidade ba públiku,” dehan nia.

Maske hasoru difikuldade, maibé Sarito dehan, durante ne’e, Jornal INDEPENDENTE tenta nafatin hodi hasa’e ninia kualidade, intermus rekursu umanus, hodi bele produs públikasaun ne’ebé iha kualidade.

Maneira ne’ebé jornal INDEPENDENTE halo, Sarito dehan, mak liu husi estabelesimentu Sentru Formasaun Tane Liberdade.

Sentru Formasaun ne’e, nia hatutan, aleinde atu forma ema ne’ebé hakarak sai jornalista, atu kapasita mós jornalista sira ne’ebé durante ne’e haknar an iha jornal INDEPENDENTE.

“Maske ami esforsu ona, maibé ami rekonese katak ami sei iha frakeza lubuk ida tanba ami-nia kbiit la to’o,” dehan nia.

Entretantu, hafoin vizita Jornal INDEPENDENTE, MAPKomS ho ekipa kontinua sira-nia programa vizita ba Suara Timor Lorosa’e (STL), no sei kontinua tan ba instituisaun media sira seluk.

Rate this item
(0 votes)
Last modified on Thursday, 09 July 2020 13:52
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« February 2023 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28          

Tempo Timor Networks

Online Counter