Liuhusi reuniaun no Xefe Governu, Ministru Jeronimo hato'o kona-ba atividade ne'ebe MAPKOS halo ligadu ho polítika komunikasaun no mos asuntu parlamentár.

"Pontu importante mak oinsá hamutuk hadi'a liuliu relasaun ho komunikasaun sosiál nian para oinsá nafatin suporta jornalista sira liuliu ba órgaun média nian ne'e tenke iha nafatin," dehan nia, hafoin soru-mutu ho Primeiru Ministru, iha Palásiu Governu, Segunda (6/7).

Aleinde ne'e, ministru mós sita kona-ba Konsellu Imprensa ne'ebé dadaun ne'e la'o mandatu remata ona, nune'e agora presiza fali mandatu foun.

Reprezentasaun ba Konsellu Imprensa nian husi parte jornalista sira nian iha hotu ona no hela de'it husi Parlamentu Nasionál no na'in ba media mak seidauk hili ninia reprezentante.

Nia hatutan, enkontru ne'e ko'alia mós kona-ba oinsá atu fó formasaun ba ofisiál média sira iha liña ministeriál hotu atu bele tranzmite informasaun di'ak liután.

Nune'e, ohin iha enkontru ne'e, Primeiru Ministru, Taur Matan Ruak, konkorda no konsidera importante atu hala'o duni pontu hirak ne'e ho di'ak liután. (*)