"Proposta lei ne'ebé mak antes ne'e aprova tiha iha Konsellu Ministru (KM) maibé PR veta, entaun veta ona mak fó fila fali ba governu para governu haree," dehan MAPKS Francisco Jerónimo ba jornalista sira iha salaun Delta Nova, hafoin halo enxeramentu ba konferénsia Asosiasaun Jornalista Timor Lorosa'e (AJTL) nian, Sabadu (04/07).
Governante ne'e afirma, kona-ba lei ne'ebé hetan veta husi PR, MAPKS sei tuur hamutuk ho jornalista sira buka solusaun.
"Se lei ne'ebé mak PR veta ne'e iha inflasaun ho komunikasaun sosiál no relasiona ho atividade jornalista ninian, ne'e mós fila fali ona ba governu, entaun, ha'u dala ida tan katak, ita sira ne'e sei tuur hamutuk para halo diskusaun hodi haree veta iha parte ne'ebé, hafoin ita halo fali esbosu ida para aprezenta fali ba Konsellu Ministru (KM) para hetan aprovasaun no haruka fila ba PR," nia dehan.
Ministru ne'e akresenta, tempu sei iha tinan ida resin, tanba ne'e governante ne'e sei esforsu, tanba lei ne'e mak hetan promulgasaun husi PR, nia benefísiu ne'e ba jornalista sira, tanba defende jornalista inklui asosiasaun hotu para di'ak liu servisu hakmatek.