Ministru asuntu Parlamentar no Komunikasaun Sosial (MAPKS) Francisco Martins da Costa Pereira Jeronimo hatete, RTTL tenke serbisu maka’as liu tan hodi halo inovasaun no buka atu hetan osan rasik.

“Ohin ha’u mai vizita RTTL.EP, aumezmu tempu enkontru mós ho direjente RTTL.EP nian hahú husi diretór, prezidente board, ho xefe departamentu sira hotu, fó orentasaun ba sira par atu prepara hanusa mak programa sira ne’ebé mak iha la’o nafatin, i iha mós obrigasaun atu buka osan, tanba ida ne’e empreza publíka, fó hanoin hela ba hotu-hotu katak tenke serbisu maka’as par bele atinze ita-nia meta, liu-liu ita-nia hanoin hakarak lori naroman ba Timor, ba mundu, tuir moto RTTL.EP nian,” dehan Jeronimo iha Kaikoli, (02/07).

Nia hatutan, nu’udar empreza públika RTTL tenke iha hanoin atu bele hetan rendimentu .

“Se hakarak atu atinze duni ita-nia hanoin ida ne’ebé mak bolu dehan empreza publíka ne’e, ita tenke haka’as aan duni atu buka income bá sustenta organizasaun ne’e rasik.”

Ministru ne’e hatutan, RTTL.EP kontinua hetan subvensaun publika husi governu, maibé labele hanoin atu depende totalmente de’it ba governu.

“Ha’u dala ida tan atu hatete, atu garante la garante hotu-hotu tenke serbisu par atu garante tanba ida ne’e empreza publíka, ita ko’alia empreza publíka ne’e estatal nian, maibé ne’e mós iha obrigasaun atu buka dalan oinsa par bele sustenta empreza ne’e la’o ba oin,” dehan nia.

Tan ne’e, nia afirma, RTTL.EP tenke hahú buka dalan atu bele hetan rendimentu, labele dehan seidauk tempu ka seidauk bele.

“Tenke hahú , se ita hein de’it ne’e labele, tenke hahú buka kondisaun oinsa par atinze mehi ne’ebé ita hotu hakarak,” dehan nia.