Tempotimor (Dili)-Primeiru Ministru (PM), Taur Matan Ruak hatete, traballadór sira haneaan eroi Ba dezenvolvimentu nasaun nian.

"Traballadór sira nu’udar eroi foun sira iha faze dezenvolvimentu nasionál daudaun ne’e nian no liuhusi sira mak ita hari’i nasaun ida-ne’ebé forte, riku no seguru”, deklara PM Taur liuhusi mensajen ba loron mundial traballadór loron 1 fulan-maiu, sábadu (01/05).

Loron Traballadór nian la’ós de’it feriadu ka loron deskansa nian ida, maibé sai nu’udar biban ida ne’ebé di’ak tebetebes atu hahí empeñu, méritu, dixiplina, profisionalizmu, serbisu iha ekipa, espíritu sakrifísiu nian no kumprimentu devér nian, ne’ebé horik nafatin iha traballadór sira, tantu nasionál nune’e mós estranjeiru sira.

Agradese mós ba Traballadór Timoroan no Estranjeiru hothotu ne’ebé kontribui ho laran tomak ba Timor-Leste ida-ne’ebé modernu, dezenvolvidu no prósperu liután.

“Ha’u hakarak tebes, hodi ha’u-nia naran rasik no Governu nia naran, hato’o ami-nia agradesimentu ne’ebé boot tebtebes ba esforsu no serbisu hotu ne'ebé Traballadór sira halo iha momentu ne'ebé ita luta hela hasoru Surtu Covid-19”, dehan Taur. (*)