Tempotimor (Dili)-Prezidente Partidu Congresso Nacional Reconstruçăo Timor-Leste (CNRT), Kay Rala Xanana Gusmăo, husu ba autoridade lokál atu mobiliza populasaun sira iha Postu Administrativu Ataúro, Cristo Rei, Dom Aleixo, Munisípiu Dili, atu partisipa programa nasional Vasina hodi prevene-an husi surtu Covid-19.

"Iha Dili, ha'u la'o ba mai haree, ema barak ba, komesa fiar dadauk ona, maibé iha Cristo Rei, nomós Dom Aleixo no Ataúro rasik, populasaun ladun book-an. Ha'u husu ba populasaun Cristo Rei ninian tenke book-an ba, ne'e ba imi-nia aan rasik, imi-nia família, maluk sira viziñu sira, ba ita tomak. Dom Aleixo mós favor ida, Xefe sira, Xefe Aldeia, Xefe Suku, favor boot ida, lori sira ba. Ne’e la’ós halimar, favor boot ida, xefe aldeia sira, Xefe suku, imi hotu ko’alia ho populasaun ba vasina”, dehan Xanana, hafoin kompleta vasina Sinovac doza daruak iha Klínik Maternidade Fatumeta, Dili, kuarta (21/07).

Maibé husu mós ba populasaun Ataúro atu book-an, lalika tauk vasina, tanba vasina atu proteje-an, família, populasaun no viziñu sira.

“Ha'u halo apelu ida ba Cristo Rei, populasaun, ba Dom Aleixu populasaun, no na Ataúro. Ita selu karik, mak dehan selu vasina ba mak dehan katak ami osan laiha. Ba (vasina). Administradór Cristo Rei, Xefe Suku Sira, Xefe Aldeia sira,  Administradór Dom Aleixu, Xefe Suku sira, Xefe Aldeia sira, book-an ba”, hatete nia.

Tanba informasaun globál, iha mundu ema kuaze rihun ba rihun mak mate tanba surtu Covid19, no kuaze ema rihun mak sei iha problema ho Covid-19, iha Ospitál sira.

"Ita-nia sorte ne’e mak tanba rai ida, illa ida ema la tama, tanba covid ne'e importandu, maibé, husu ba imi hotu atu kuidadu-an ba. Imi-nia responsábilidade ba sira. Ne'e duni, imi tenke hamutuk, lori populasaun ba vasina. Bainhira ita hotu hetan vasina, ita livre ona. Ha'u-nia mensajen mak ne'e”, informa Xanana. (*)