Tempotimor (Dili)-Vise-Ministra Solidariedade Sosial no Inkluzaaun (Vise-MSSI), Signi Verdial hatete, Governu  aprezenta ona lei Rejime Jurídiku kona-ba ba Eis titulares ka hanaran Pensaun Vitalisia horseik (31/01) ba Parlamentu Nasionál, maibé deputadu sira haruka hadi’a tán lai.

Maibé, deputadu sira iha Parlamentu Nasional laiha esplikasaun no rekomendasaun ida klaru ba hadi’a lei ne’e, nune’e kria konfuzaun ba Governu.

"Proposta da lei horseik (31/01) ita aprezenta ba iha Parlamentu Nasionál kona-ba rejime jurídiku ba ita nia titulares sira horseik la passa iha Parlamentu, nune'e Deputadu sira husu ba Governu atu hadia", dehan nia hafoin reuniaun Konsellu Ministru iha Palásiu Governu, kuarta (01/02).

Proposta sira iha Lei Rejime jurídiku ne'e rasik governu hadi’a tiha ona, maibé kontinua la passa nune'e Parlamentu Nasionál husu atu hadi’a didiak lei refere, maibé la iha esplikasaun klaru husi Deputadu sira  atu hadi’a lei parte ida ne'ebé.

Tanba Deputadu sira iha Parlamentu Nasionál la halo esplikasaun klaru sei la ajuda governu atu hadi’a di'ak liu tan no difikulta lori fali ba Parlamentu Nasionál atu debate.

"Maibé governu nia hanoin artigu sira iha Proposta laran ne'e ita hadi’a hotu ona, entaun ami husu sekarik Parlamentu hakarak ami governu hadi’a tenke mensiona espesífikamente parte ne'ebé mak governu atu hadi’a la'os atu halo statementu jerál de'it, entaun difísil ba Governu atu hadi’a iha parte ne'ebé? Entaun ida ne'e mak horseik ami Propoin ba Parlamentu karik bele halo rekomendasaun mais profunda iha parte ida ne'ebé loos mak ita atu hadi’a, maibé horseik la passa la konsege vota", hateten nia.

Nune'e, Prezidente Parlamentu sujere fali mai governu, maibé la iha rekomendasaun klaru atu hadi’a rejime jurídiku ka lei ida ne'ebé, nune'e sei difísil ba Governu atu hadi’a lei Pensaun Vitalisia.

Kestaun tuir mai, Governu sei hein Parlamentu Nasionál haruka karta ba Governu bainhira mak atu halo debate fali ba rejime jurídiku ba lei Pensaun Vitalisia.

Kona-ba rejime jurídiku ne'e, parte Governu hein rekomendasaun husi Parlamentu Nasionál atu halo mudansa ba lei ida ne'ebé, tanba ne'e Governu kontinua mantein nia pozisaun iha lei refere. (*)