Tempotimor (Dili)-Sekretáriu Estadu Terras Propriedade liuhosi Diretór Jeral Terras Propriedade, Rodrigo Mendoça hatete, governu identifika ona fatin 6 (neen) ba família ne'ebé afeta dezastre naturá iha loron 4 fulan-abríl tinan 2021.

“Fatin neen ne'ebé ami prepara hanesan, husi leste nian iha Hera to'o Metinaro, parte Oeste inklui Oekuse iha Tibar, ema mai husi Aileu, Same, Suai ami prepara husi parte Aileu iha postu Laulara”, dehan nia iha nia kna’ar fatin Bebora, kuarta (05/05).

Maibé, primeiru sei indentifika uluk ema ne'e orijen mai husi ne'ebé no nia mai iha Dili ne'e tanba eskola, serbisu ka ema hakarak mai hela duni iha Dili tanba Dili fatin sentrál hodi buka servisu.

“Ami sei identifika ema tuir ninia Munisípiu karik lorosa’e ami prepara iha Hera no husi Likisá Bobonaru ami prepara iha tinan no husi Suai, Ainaru, Same, ami identifika iha Postu Laulara”, esplika nia.

Tanba ne’e, komunidade tenke ses oituan husi Dili, nune'e sidade Dili bele organiza didi’ak atubele investe administrasaun ho ekonomia bele la'o ho di'ak, maibé parte kompetente hala'o planu ida ne'e provizória de'it maibé presiza desizaun polítika hodi prevé orsamentu atu assegura planu.(*)