Tempotimor (Díli) – Komisaun Permanente iha Parlamentu Nasionál (KPPN), Segunda (09/09/19) fó votus pezar ba saudozu Lucas da Costa ‘Rama Metan’ ne'ebé hakotu nia-iis iha Hospitál Nasionál Guido Valadares (HNGV), Kinta (05/09/19) dader semana liubá.

Votus pezar ba saudozu Lucas da Costa ‘Rama Metan’ ne'e, a favor 19 kontra no abstensaun zero.

Tuir informasaun ne'ebé  www.tempotimor.com asesu katak, Parlamentu Nasionál sei presta omenajem ikus ba saudozu Lucas da Costa ‘Rama Metan’ iha Parlamentu Nasionál ohin lokraik tuku 02.50 iha salaun plenaria Parlamentu Nasionál.

Tempotimor (Díli) – Deputadu bankada Governu, Aderito Hugo da Costa afirma, komposisaun VIII Governu Konstitusionál kompletu hela.

"Governu inkompletu mós ha'u la haree. Tanba, ministru balun enkaregadu hela. Ne'ebé, Governu la'o hela. Ha'u la haree Governu ain-tolu. Governu ain-tolu karik, monu tiha ona," afirma deputadu Aderito Hugo iha Parlamentu Nasionál, Segunda (09/09/19).

Nia dehan, bankada AMP iha Parlamentu Nasionál la'ós tan maioria. Maibé  AMP+ (plus).

"Agora iha Parlamentu Nasionál, la'ós AMP maioria. Maibé, AMP+. Tanba AMP loloos ne'e iha deputadu 36 de'it. Maibé, iha prosesu votasaun sira ne'ebé liu ona ne'e, sempre pasa ho votus a favor 41 dalaruma 42. Signifika, AMP ne'e AMP+ tiha ona," nia dehan.

Alende ne'e, deputadu Hugo mós realsa Timor-Leste ne'e nasaun kiik tanba ne'e membru Governu uitoan de'it para servisu efetivu liu no gasta osan moos kiik.

Iha fatin hanesan vise I Prezidente Parlamentu Nasionál Maria Angelina Sarmento katak, membru Governu ne'ebé kontinua inkompletu ne'e, afeta tebes ba ezekusaun orsamentu ne'ebé Governu iha.

"Klaru katak ho membru ne'ebé inkompletu hela ne'e, fó impaktu duni ba ezekusaun orsamentu VIII Governu Konstitusional nian, tanba iha organika  Governu nian iha Ministru, Vise Ministru no Sekretáriu Estadu, inklui iha ezekusaun orsamentu," tenik Maria.

Tempotimor (Dili) – Prezidente Parlamentu Nasionál (PPN) husu ba Governu sentrál no autoridade RAEOA-ZEESM, tenki solusiona lalais problema ró Haksolok, ne'ebé to'o agora seidauk mai Timor-Leste.

Tempotimor (Dili) – Impasse polítika iha rai laran seidauk hetan solusaun. Bankada Aliansa Mudansa ba Progresu (AMP) iha Parlamentu Nasionál (PN), firme ho sira-nia posizaun. Bainhira membru Governu pendente seidauk hetan pose, laiha a favor ba Prezidente Repúblika (PR) halo viajen ba rai liur.

“Bankada AMP la autoriza Prezidente Repúblika ba partisipa Asembleia Jerál UNO iha Novaiorke, bainhira membru Governu pendente seidauk hetan pose,” afirma Vise II Prezidente Parlamentu Nasionál (PN), Luis Roberto ba tempotimor.com, Kuarta (18/09/19) iha Parlamentu Nasionál.   

Tuir Luis, ida ne'e realidade. La'ós tan aspetu seluk. Nia dehan, tanba impasse polítika mak mosu impedimentu ida para oinsá PR ho VIII Governu, bele tuur hamutuk hodi rezolve impasse ne'e.

Deputadu Bankada KHUNTO ne'e katak, viajen ba estranjeiru ne'e buat seluk ida. Importante liu mak rai laran.

"Iha impasse polítika ne'e, viajen ba rai liur ne'e, buat seluk ida. Importante liu, mak rai laran. Ita viajen ba rai liur mós imposivel ita mai, halo buat hotu. Importante mak ita nia nasaun ne'e, kuandu buat hotu la'o ho di'ak," nia afirma.

Luis dehan, politikamente halo impedimentu. La fó autorizasaun ba Prezidente Repúblika halo viajen. “Lei mós hakerek. Ne'ebé, ita hotu-hotu bazeia ba lei ne'ebé prevé tiha ona, la'ós Parlamentu Nasionál foti tuir nia hakarak. PN mós foti tuir lei ne'ebé prevé tiha ona," Luis esplika.

TERSA, loron 10 Setembru 2019, Xanana Gusmão derepente hirus. Lutu husi ai ne'ebé Kompañia Marino Interprise monta, iha fatin produz britas área Kaitehu, Munisípiu Likisa, Xanana sobu.

Asaun ne'ebé Xanana halo ne'e, hafoin loron ida tribunál hasai desizaun a favor ba kompañia Marino Enterprise hodi impede produsaun britas, ho razaun katak, rai ne'e nu'udar kompañia Marino Enterprise nia propriodade. Tan ne'e, kompañia Marino Enterprise hamutuk ho ninia advogado no membru polísia iha loron Segunda (09/09/19), ba kedas iha fatin refere hodi tau liña polísia nian no monta lutu.

Xanana akuza, Kompañia Marino Enterprise fó subornu ba tribunál hodi hasai desizaun a favor ba kompañia Marino Enterpise, hodi impede produsaun britas ba projetu portu Tibar. Tan ida ne'e, projetu konstrusaun portu Tibar mós para.

"Ha'u dehan, imi labele tau problema iha tribunál. Tanba Portu Tibar ne'e, la'os ba ha'u. Ba Timor tomak," Xanana dehan ho lian maka'as.

Xanana deklara, nia prontu tama kadeia tan interese nasionál, bainhira tribunál kontinua hatudu nia karater simu subornu husi kompañia.

“Atu kaer ha'u atu ba Bekora ha'u prontu. Ba interese nasionál, ha'u prontu ba buat hotu-hotu. Ne'e duni, lalika halimar ho ha'u. Portu Tibar ida ne'e, la'ós ba ha'u. La'ós hotel ida ha'u atu hela,” Xanana afirma.

Xanana hatene, rai oan pedasuk ne'e, kompañia Marino Enterprise sosa husi komunidade ida iha parte ne'ebá ho folin 15.000 dolares Amérika. “Sei tribunál haruka taka, ha'u mak ne'e. Ha'u mak ne'e, haruka servisu fali. Tribunál hakarak, maka ha'u prontu ba kadeia. Ha'u prontu ba kadeia. Imi servisu nafatin,” Xanana enkoraja traballadór sira.

Xanana mós fó avizu ba tribunál atu lori de'it nia (xanana) ba tribunál, la presiza julgamentu. Nia dehan, atu defende nasaun nia interese, ba saida de'it, nia prontu.

“Ha'u mak ne'e. Ha'u la simu osan husi Bolore (kompañia ne'ebé agora konstrui hela portu Tibar), ha'u la simu osan husi cheq. Hanesan mós ha'u ba defende ita-nia fronteira marítima, ha'u la simu osan,” Xanana ko'alia ho lian maka'as.

Iha fatin refere, Ministru Justisa, autoridade lokál nomos Polísia lakohi fó komentariu kona-ba asaun ne'ebé Xanana halo. “Ha'u la fó. Labele obriga ha'u atu ko'alia,” hatete Ministru Justisa, Manuel Cárceres da Costa ba jornalista.

Tempotimor (Dili) – Situasaun Governu Konstitusionál daualu ne’ebé kontinua la’o ho membru ne’ebé la kompletu, hamosu preokupasaun husi deputadu Koligasaun Aliansa Mudansa ba Progresu (AMP).

Situasaun ida ne’e mosu tanba Prezidente Repúblika Francisco Guterres Lú Olo pendente kandidatu membru governu na’in sia (9), no to’o ohin loron seidauk iha solusaun ba problema ne’e.

Vise Prezidente Parlamentu Nasionál, Maria Angelina Sarmento konsidera desizaun PR Lú Olo hodi pendente kandidatu membru governu na’in 9 ne'e, haksoit liu kompetensia tribunál nian.

Tuir nia, loloos PR Lú Olo labele deside ema ida sala ka komete krime, bainhira tribunál seidauk foti desizaun.

“Ita labele haksoit liu kompetensia orgaun seluk nian, ne’e mak tribunál. Tribunál kuandu seidauk deside, nein ema ida, nein forsa polítika ida foti fali knaar tribunál nian hodi deside katak ema ne’e kulpadu ona, ka ema ne’e komete ona krime boot ida hasoru estadu,” deklara Vise Prezidente PN ne’e iha PN, Segunda (09/09).

Maria husu ba Xefe Estadu atu labele halo interpretasaun no foti desizaun ba individu ida-idak, ne’ebé la bazeia ba ninia kompetensia.

“Ida ne’e mak ha’u hanoin, ita hotu presiza iha sensibilidade ida kona-ba sasan sira hanesan ne’e, atu nune’e ita labele tama iha situasaun ida ke ita hola desizaun, halo interpretasaun ba individu ida nia lala'ok iha estadu ida ne’e, tuir ita nia kompetensia fali, ka tuir ita-nia poder fali. Ne’e la loos,” Maria dehan.

Tempotimor (Dili) – La hanesan ho tinan hirak liubá. Selebrasaun Loron Proklamasaun Independensia ba 44, tinan ida ne'e, sei la'o ho simples. Maski nune'e, iha okaziaun ne'e, estadu sei fó kondekorasaun 74 ba veteranus no ema estranjeiru balun.

Vise Ministru Administrasaun Estatál, Abilio Caetano informa kestaun ne'e iha Palásiu Prezidensiál Bairru-pite, Dili, Segunda (25/11/19), hafoin hasoru Prezidente Repúblika.

"Atividade no lala'ok komemora 28 Novembru tinan ida ne'e, simples liu. Maibé, nafatin valoriza istóriku loron Proklamasaun ne'ebé tinan ne'e halo ba 44," dehan Abilio.

Nia esplika, sekuensia sei la'o hanesan baibain. Maibé, interkala ho kondekorasaun ba veteranus no ema balun husi rai liur, tuir dadus ne'ebé fó sai husi Gabinete Prezidente Republika hamutuk ema 74.

“Kona-ba kondekorasaun 74 ne'e, seidauk bele fó sai ba públiku. Tanba, sei hein iha loron 28 Novembru maka sai dala ida. Maibé, tuir dadus loloos iha 74 kondekorasaun,” nia hatete.

Abilio dehan, hahú husi loron 26 to'o 28  Novembru sei hala'o feira iha Centro Convenções Dili (CCD). Iha loron 27 Novembru maizumenus tuku 09.00 dadeer, sei hala'o mós misa agradesimentu iha Katedrál Imaculada da Conceição, Vila-Verde,Dili.

“Iha 28 Novembru selebra loron Proklamasaun Independensia ba tinan 44, sei hahú tuku 9.00 dadeer iha Palásiu Governu. Iha momentu ne'e, Prezidente Repúblika Francisco Guterres Lú Olo mak sei sai inspetór serimónia hasa'e Bandera RDTL,” Abilio informa.

Nia dehan, iha parte loraik, Prezidente Parlamentu Nasionál, Arão Noe mak sei sai inspetór serimonia iha seremonia hatún Bandeira RDTL.

Tempotimor (Dili) - Parlamentu Nasionál dala tolu tutuir malu kansela viajen Prezidente Republika nian ba rai liur. Maibe iha sorin seluk, fo liberdade ba Prezidente PN hodi ba 'pasiar' iha estranjeiru.

Tempotimor (Dili) - Parlamentu Nasionál 'foin' hanoin atu halo regulasaun foun hodi regula media sosial (Medsos) hafoin mosu liafuan goblok husi membru Parlamentu Nasional balun.

"Problema ida ne'e (liafuan goblok)  problema sériu", dehan Prezidente Parlamentu Nasionál, iha Palásiu Prezidensiál Bairru-Pité, Kuarta (29/5).

La'os deit ba kazu insultu husi Deputadu Guntur nian, Prezidente Repúblika mos hato'o  ninia preokupasaun ba problema etika uzu media sosial. Maibe parte hotu-hotu preokupa liu ho lian Goblok ne'e deputadu Guntur hasai hasoru Xefe do Estadu hodi haluha kondena lider sira balun hasai lia fuan dehan lider seluk "beikten."

"Ami hanoin mak ita bele kriminaliza defamasaun, entaun kazu rua ne'e ita hotu konsidera bele halo aterasaun ba lei kódigu penal para bele halo ativu defamasaun hanesan krime, tanba iha kódigu penal la fó dalan ba krime", dehan Arão.

Kazu seluk mak aprovasaun lei ida para regulariza atividade sira ne'ebé lao iha média sosiál. Tanba media konvensional ne'e Konsellu Imprensa mak kontrola no monitoriza, maibe média sosiál ne'e la hatene se mak halo monitorizasaun. Ne'e duni, presiza regulasaun foun.

Nia hatutan, presiza duni lei ida no fo kompetensia ba orgaun ruma hodi kontrola, hanesan akontese iha Indonézia foin dadauk problema, Governu foti desizaun hapara hotu média sosial sira la halo servisu.

Siginifika, Governu iha kompetensia para interven tanba iha lei. Tanba ne'e, fó kompetensia ba orgaun ida hodi bele kontrola atu bele responsablidade ba média liu-liu sira ne'ebé uza média sosial.

Page 2 of 2

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com