Tempotimor (Dili) – Bankada PLP lamenta ho polítika ONG Plan Internasionál (PI) ne'ebé prepara joven feto sira, atu hola parte iha orgaun estadu nian iha oras balun nia laran.

"PLAN Internasionál prepara ona la'ós model hanesan ne'e. Viola regras hotu, buka saida iha ne'e? Plan Internasionál ne'e organizasaun ida, Parlamentu Nasionál iha juventude, Juventude Parlamentar. Agora, ita ema mai ida-idak, ita mai halo orgaun ida ne'e, parte ida ita dignifika estadu, maibé parte ida ladi'ak, nu'udar estadu direitu demokrátiku," dehan Deputadu PLP, Francisco Vasconcelhos iha plenária bainhira Mália da Costa hola pozisaun nu'udar deputada PD, durante oras ida nia laran, Segunda (14/10/19).

Deputadu ne'e la konkorda ho átu ne'ebé mak Plan Internasionál halo. "Ha'u la konkorda ho átu ne'e. Ita labele buka popularidade, depois ita viola regras hotu, ita nia preparasaun ba ita nia joven sira la'ós ho maneira sira hanesan ne'e,” deputadu hatete.

Iha fatin hanesan, deputada Josefa Soares katak hakarak atu dignifika estadu tenke iha regras.

"Ita hakarak atu dignifika estadu ne'e la'ós ho maneira sira hanesan ne'e. Hakarak halo tratamentu bainhira ema, sim señor, Parlamentu Nasionál bele konsede fatin seluk, para sai hanesan treinamentu. Maibé, la'ós iha plenária soberanu ida ne'e. Se ita hakarak dignifika estadu ne'e tenke tuir regras. La'ós ONG ida mai fali iha ne'e no hakat liu fali. Ida ne'e labele," hatete Josefa.

Hatan ba kestaun ne'e Prezidente Parlamentu Nasional (PPN) Arão Noé de Jesus da Costa Amaral katak, asaun ne'e soe ona ba lidera bankada, maibé Laiha pronunsia ruma kona-ba prezensa alin Mália.

"Iha dia 11 Outubru, loron mundiál labarik feto sira. Tanba ne'e, asaun ne'e hahú kedas iha semana kotuk, PR nia halo, PM mós halo, inklui membru Governu balun halo ona.  Tanba ne'e, ohin molok alin ne'e tama mai, ha'u soe ona ba lideres bankada sira. Maibé, laiha pronunsia entaun ita fó alin ne'e mai hola pozisaun hanesan Prezidente Bankada (PD)," dehan PPN Arão.

Tempotimor (Dili)-Bankada Fretilin iha Parlamentu Nasional husu ba governu atu tau prioridade ba seitór agrikultura.

Tempotimor (Dili) – Vise Prezidente Parlamentu Nasionál, Luis Roberto hatete para bele ezekuta ho di'ak Orsamentu Jerál Estadu (OJE) 2020, presiza halo kompleta estrutura membru Governu, inklui na'in sia (9) ne'ebé to'o agora sediauk hetan tomada pose, husi Prezidente Repúblika.

“PN husu nafatin ba Prezidente Repúblika atu fó pose ba membtu Governu na'in sia (9) hodi bele ezekuta OJE 2020. Bainhira la hetan pose, susar atu hetan garantia ba ezekusaun orsamentu ho di'ak,” hatete Vise II PPN ne'e ba média, Segunda (07/10/19) iha Parlamentu Nasionál.

Nia esplika, PN hala'o ninia funsaun hanesan reprezenta povu hodi prevee orsamentu. “Maibé, atu ezekuta ou halo jestaun ba OJE ne'e, Governu mak hatene. Tan ne'e, ita husu ba Prezidente Repúblika atu halo kompletu ou fó pose ba membru Governu na'in sia (9),” Luis husu.

Entretantu, deputada Bankada PLP, Maria Angelina Sarmento hateten, iha proposta IJE 2020 ne'e, dia 15 Uutubru sei mai iha PN sei halo diskusaun. Nune'e, sei halo revizaun ba OJE atu tetu oinsa Governu atu ezekuta.

"Tanba ne'e PN nia funsaun atu fiskaliza no fó hanoin dei't ba Governu.  Tanba ne'e ita hotu fo fiar ba Governu nu'udar ezekutadór atu bele ezekuta OJE povu nian. Nune'e, atu ezekuta ho di'ak depende ba Governu atu oinsá para bele rezolve mós membru Governu ne'ebe inkompletu hodi garante ba ezekusaun osan povu nian," katak Angelina.

Nia afirma, proposta OJE ba tinan 2020 ne'ebe aprova ona husi Konselu Ministru ho montante $ 1.95 Biliaun atu ezekuta ho diak filafali ba Goveru.

Tempotimor (Dili) – Atensaun ba netizen sira ne'ebé durante ne'e toman an hakerek status kondena ema, nomós defama ema seluk iha media sosiál laran. La kleur tan, Timor-Leste sei iha lei ba krime Sibérnetiku.  

Tempotimor (Dili) – Xefe negosiador ba Fronteira Maritima, Kay Rala Xanana Gusmão lansa kontra atake hasoru propaganda Sekretariu Jeral partidu FRETILIN, Mari Alkatiri nia públikasaun iha plata forma media sosial (Facebook) ne’ebé konsidera diskusaun ba alterasaun pakote lejislasaun lubuk ida iha Parlamentu Nasionál nu’udar teatru boot ida.

Públikasaun ID Facebook Mari Alkatiri iha loron Tersa (16/07) katak nia sente triste tebes no konsidera esplikasaun Kay Rala Xanana Gusmão iha Parlamenu Nasionál nu’udar teatru ida.

“Ha’u tristi hare “teatro” ohin iha PN. Irmão XG, favor ida! Iha politika, demokrasia tenki loke dalan ba interaksaun. Abraço,” hakerek Mari Alkatiri iha nia Facebook, Tersa (16/07).

Status Alkatiri nian ne’e hetan komentariu 13, ema nain 37 mak share (fahe tutan), nain 12 Like Super, nain 8 hamnasa hahaek, nain 5 hakfodak, nain 5 triste no nain 176 mak like baibain.

“Lakohi diálogo? Hau fiar hau nia irmão XG la iha buat ida atu subar. Tanba ne' e hau la kompreende bainhira hase'es an husi interaksaun, husi diálogo onesto no nakloke,” afirma Alkatiri.

“Tempo Funu fo ezemplu diak. Simu Koronel Purwantu halo "kontaktu dame". Tanba sa agora taka dalan ba diálogo? Tristi tebes”.

Entretantu, diskusaun ba alterasaun lei ba assuntu tratadu tasi Timor tama ba loron daruak, Kuarta (17/07) iha tempo meudia nian, deputadu FRETILIN, Antonino Bianco hatete lider sira hamutuk iha prosesu halo akordu tasi Timor entre Timor – Leste ho Australia iha governu konstitusional dahuluk, maibé nia kestiona no husu katak akordu foun ba tratadu tasi Timor ne’e lahatene lider sira iha hotu laran ka la’e.

“Na’i ulun sira, lider istoriku uluk sira, ida uluk ne’e hotu – hotu rame – rame. Balun asina, balun hamrik iha kotuk. Agora halo oinsá? Ne’e mak ita tenke husu ba malu hodi ko’alia hatan ba malu ba interese ema hotu nian,” deklara deputadu Bianco iha Parlamentu Nasionál, Dili Kuarta (17/07).

Deputadu Bianco seidauk remata nia deklarasaun, hetan kedas atake kontra (counter attack) husi Xefe negosiador ba Fronteira Maritima, Kay Rala Xanana Gusmão katak nia sempre husu bebeik atu halo dialogu, maibé parte FRETILIN mak la hatudu politika laran di’ak nia.

“Dalaruma ita boot ezije atu lider sira tur hamutuk. Ha’u bolu ita boot sira, konvida ita boot sira atu ba CCD (Centro Convenção Dili) dehan katak ha’u halo pre-kampaña eleitoral. Imi halo tiha, imi halo tiha opozisaun hanesan ne’e ha’u mak tenke ba rei imi nia kidung. Deskulpa!,” deklara Xanana ho hirus tebes no hakilar lian maka’as.

“Ha’u laiha Facebook. Ema hatudu dehan ne’e halo teatru boot ida, ne’e buka oin. Ha’u nonok de’it. Agora ita boot mai temi bebeik, temi bebeik katak lider sira tenke hamutuk. Agora ha’u mak tenke ba hakruk? Deskulpa!”.

Tempotimor (Dili): I Vise Prezidente Parlamentu Nasionál, Maria Angelina katak la lójika bainhira bankada FRETILIN vota kontra proposta revizaun lei atividades petrolíferas.  

"Buat ne’e atu garante ba kompaña operadór ne'ebé halo hela operasaun iha kampu Bayu Undan no ba futuru, karik sira halo operasaun iha kampu Greater Sunrise depois de asina tratadu fronteira marítima. Prosesu ne'e, ajusta de'it husi akordu sira ne'ebé hala'o ona husi akordu CMATS nian," dehan Maria Angelina iha Parlamentu Nasionál, Tersa (16/07/2019).

Nia afirma, provizaun maioria ne'ebé foti hodi ajusta iha proposta de lei hirak ne'e, foti husi Tratadu Tasi Timor nian. 

"Tratadu Tasi Timor, momentu ne'ebé uluk governu FRETILIN ukun, sira mak halo tratadu ida ne'e. Agora, ita foti husi tratadu Tasi Timor ninia provizaun sira, hodi ajusta de'it ba Tratadu Fronteira Marítima, tuir esplikasaun ne'ebé ohin hato'o," dehan Maria. 

Tan ne’e, la lójika bainhira FRETILIN vota kontra ba proposta de lei ne'e. "Sira vota afavór iha fronteira maritime, maibé sira vota kontra ba iha proposta de lei ne'e, ba ha'u laiha lójika. Tanba, buat rua ne'e iha integradu ba malu. Ne'ebé, laiha ida mak ketak husi ida," Maria esplika.

Nia afirma, TL define fronteira marítima ne'e hodi define soberania TL nian. Maibé, TL mós define independensia ekonomia ne'ebé TL sei iha. "Proposta de lei hirak ne'e, atu asegura no salva guarda iha futuru no ita sei iha garantia ba independensia ekonomia ne'ebé define iha fronteira marítima ida ne'e. 

Tuir Maria Angelina, akordu ida uluk kona ba 10% ba Australia ne'e TL hakarak 100% mai hotu TL. Entaun prevé ida ne'e iha proposta lei sira la'os iha fronteira marítima.

"Partidu FRETILIN mak uluk deklara kona-ba ukun rasik aan. Soberania nasaun ida ne'e nian. Ne'ebé ita ukun aan ne'e la'os hetan Bandeira de'it, Hinu Nasionál, la'ós iha de'it nasaun ida RDTL ne'e no lingua. Maibé, ita ukun aan ne'e ekonomikamente ita mós ukun aan," dehan Angelina.