Tempotimor (Dili)-Governu liuhusi Ministériu ba Asuntu Parlamentáres no Komúnikasaun Sosiál (MAPKomS) kongratula jornalista sira iha selebrasaun loron mundial liberdade imprensa.

Selebrasaun loron liberdade imprensa ne’ebé kada tinan sempre komemora iha loron segunda (03/05), atu fó apresiasaun no korajen nafatin ba ema ne’ebé servisu iha meiu komunikasaun liuliu mídia sira iha mundu.

Tanba ne’e, Ministru Asuntu Parlamentar no komunikasaun Sosial, Francisco Martins Jerónimo, iha ninia mensajen ba selebrasaun loron ne’e, atu apresia no kongratula ema hotu ne’ebé hala’o kna’ar iha mídia sira iha mundu inklui Timor-Leste..

Nasaun Timor-Leste maske foin restaura ninia independesia ba dala19, maibé konstituisaun Repúblika garante ona Liberdade imprensa, iha artigu 40 ne'ebé ko'alia (Liberdade espresaun no informasaun), no artigu 41 (Liberdade imprensa no meiu komunikasaun sosiál nian sira).

Ho ida ne’e, Ministru Francisco hatete, Governu konstitusionál daualu kontinua komprometidu atu promove bebeik dezenvolvimentu setór komunikasaun sosiál nian no dezenvolvimentu ba ninia padraun profisionál sira.

Nune'e, iha situasaun ne'ebé difísil, Governu liuhusi Ministériu ba Asuntus Parlamentares, aloka nafatin verba orsamentu iha fundu Covid-19 nian hodi apoiu ba Jornalista liña frente sira.

Iha mós apoiu ba kampaña publisitaria sira kona-ba prevensaun no mitigasaun COvid-19 no hakbi’it kapasidade orgaun komunikasaun sosiál sira atu iha kondisaun para halo servisu iha periodu pandemia ida ne’e, nu'udár parte integradu ida iha planu rekoperasaun ekonomiku nian. (*)