Tempotimor (Dili) - Ministériu Turizmu no Komérsiu Indústria (MTKI) lansa sertifikadu elektronika hodi fasilitasaun atividade esportasaun no importasaun entre Timor-Leste ho Xina.

Ministru Turizmu no Komérsiu Indústria, Jose do Carmo da Silva hateten, lansamentu sertifikadu ne'e oportunidade no istoriku ba Timor, liuliu ba governu no parseiro sira, tanba bele lansa sertifikadu orijen eletróniku ne'e.

"Era dijital agora ne'e ita presiza tebes atu buka meiu hodi bele akomoda interese autór sira ne'ebé halo negósiu, ho nune'e bele fasilita sira hodi kompete iha merkadu rejionál no internasionál", dehan Ministru, iha edifísiu MTCI, Kinta (21/09).

Nia hatutan, ministériu hanoin tebes atu kria atendementu públiku ne'ebe lais, fasil no tranparante ba pasu importante ne'e.

Sertifikadu ne'e sei haforsa no hakbiit integrasaun dadus orijen Timor ninia, ho nivel rejionál no nivel internasionál iha prosesu negósiu.

"Medida no estratejia ne'e ita opta atu hasae ka eleva kompetividade iha nivel rejionál no internasionál, nune'e atu dudu TL adopta pratika ho negosiu ho inovativu no enkoraja fasilidade negósiu, ho estandar ne'ebe adopta ona iha nivel rejionál no internasionál", dehan Ministru José.

Lansamentu ne'e mós aliña ho programa Governu nian diretiva iha implementasaun programa servisu dijitál nian.

Ministru mós atu partilla ba públiku katak, bazeia ba dadus ne'ebé publika iha website forum Makau ninia, bazeia mós ba estatistika costum service ne'ebé relata katak TL iha relasaun merkadu relativamente, aumenta uitoan negósiu ho governu Xina iha nasaun CPLP por volta de tokon $ 1.950 iha transasaun komersiál.

Lansamentu sertifikadu orijen ne'ebé lansa, sei haforsa no atinji meta jeral fasilidade halo negósiu nian iha enkuadramentu Ázia Pasífiku nune'e mos iha Uniaun Europeia ninia.

Ministru haforsa tan, sertifikadu ne'e util tebes iha relasaun atu halo importasaun no esportasaun ba Xina, nune'e mos ba rejiaun Europeia.

Iha fatin hanesan, Embaixadór Xina mai TL, Xiao Jianguo, haksolok tebes tanba TL ho Xina bele halo kooperasaun ba negosiasaun sasán importasaun no esportasaun.

"Ida ne'e servisu hamutuk entre nasaun TL ho Xina iha kooperasaun ne'ebe pozitivu tebetebes" dehan embaixador Xiao.

Nia hatutan, nu'udar reprezentante nasaun Xina agradese ba miniterio hotu hotu, liuliu komérsiu nian no espera ba futuru sei esporta sasán TL nia ba Xina ho diak liután.

Nia dehan, sei nafatin servisu hmutuk ho MTKI no kontrola nafatin kualidade para ba oin avansadu liutan no bele ajuda agrikultór sira.

Tanba, agrikultór iha TL ne'e kapaas tebes, liuliu kafe lakuten, tanba Xina deskobre katak kafe ne'e iha kualidade ne'ebe diak tebtebes. (*)