Tempotimor (Dili) - Ministériu Saúde (MS) rekoñese fasilidade iha Ospitál Nasionál Guido Valadares (HNGV) sei menus, tanba ne'e sei iha pasiente balun kontinua toba iha rai.

Tempotimor (Dili)-Deklarasaun Primeiru Ministru Taur Matan Ruak kona-ba orsamentu millaun $61 ba konstrusaun postu saúde iha Timor Leste tomak hamosu kritika husi deputadu bankada FRETILIN tanba konsidera PM Taur fó sai lia-bosok.

Tempotimor (Dili)-Deputada Bankada KHUNTO Olinda Guterres husu ba Primeiru Ministru Taur Matan Ruak atu hatama iha Vise Ministru Saúde na’in rua, Elia dos Santos Reis Amaral no Bonifacio Mau Coli, iha lista remodelasaun.

Tempotimor (Dili)-Asesor na’in hira mak durante ne’e fó apoiu ba Ministériu Saúde atu ministériu ne’e bele hala’o serbisu ho di’ak liu tan? Klaru katak, asesor iha ministériu ne’e la’os na’in tolu (3) de’it, la’os na’in 10, la’os mós na’in 20. Ministériu ne’e iha asesor hamutuk na’in 41.

 Tempotimor (Dili)-Enfermeira ida ho inisial DX ne’ebé deskonfia lori sai aimoruk husi Hospital Nasional Guido Valadares (HNGV) deklara katak kaixa haat ne’ebé nia tula dala rua la’os aimoruk, maibé soru-been.

Tempotimor (Dili)-Reprezentante komunidade Vikeke ezije ba Ministériu Saúde (MS) atu kumpri promesa hodi harii Ospital Distrital. Reprezentante Komunidade Vikeke ohin, Segunda (28/10) hasoru Prezidente Repúblika Francisco Guterres Lu Olo hodi hato’o sira-nia ezijensia.

Tempotimor (Dili)-Hospital Nasionál Guido Valadares (HNGV) hasai ona rezultadu teste mediku ne’ebé hatudu katak arguidu ho inisial CdJ ne’ebé tenta soke aviaun Sriwijaya iha Aeroportu Internasional Nicolau Lobato Komoro sofre moras mental.

Tempotimor (Dili) – Ministru Saúde interino, Bonifácio Maucoli fó atensaun ba komunidade iha rai laran, atu labele konsume na'an fahi mate tan moras. Tanba sei fó impaktu ba saúde.

"Kuandu ema konsume na'an ne'ebé mak afetadu husi virus ne'e, nia impaktu ema mós kona hotu. Ida ne'e mak durante ne'e ami halo ona apelu, para ema labele konsume na'an fahi ne'ebé mate tan moras," dehan Ministru Saúde interinu ne'e iha Palásiu Governu,  Kuarta (25/09/19).

Nia afirma,  virus ne'ebé iha ne'e mai husi kutun animál nian. "Moras ne'e, mai husi kutun animál sira ne'e. Hanesan akontese iha fatin-fatin. Dalaruma, moras ne'e importa fali husi nasaun seluk mai. Tanba ita fronteira ho Indonézia. Dalaruma hatama manu, animál sira ne'e bele da'et fali ba ita nia animál rai laran," Maucoli esplika.

Parte saúde no Ministériu Agrikultura no Peskas, tuir Maucoli, halo ona kooperasaun inklui aprezenta ona Projetu de Lei ba Governu atu halo regulamentu ba sanitáriu internasionál.

"Ami aprezenta ona Projetu de Lei ba Governu atu halo regulamentu ba sanitasaun internasionál nian, para bainhira sasán sira tama ne'e iha lei para regula sira, atu nune'e labele lori fali moras mai Timor," dehan Maucoli.

Parte saúde, nia dehan, seidauk halo identifikasaun moras ne'e naran saida,  maibé atu identifika moras ne'e parte veternária mak bele halo identifikasaun.

Tempotimor (Díli) – Kondisaun Padre João de Deus, SDB iha Hospitál Nasionál Guido Valadares (HNGV), seidauk lori mudansa ne'ebé signifikante.

Diretór Apoiu Diagnostiku no Terapeutiku HNGV, Doutór Mendes Pinto hatete, atu rekopera kondisaun Padre João de Deus todan uitoan. Tanba, orgaun lubuk ida mak afetadu.

"Doutor hotu sempre iha esperansa. Doutór nia objetivu halo tratamentu hakarak di'ak no rekopera fali. Maibé, ita sente hanesan todan uitoan tanba orgaun lubuk ida mak afeta. Depois, ho padre nia idade ne'ebé mak avansadu ona (91 anos). Maske sente todan, mas ita nafatin fó tratamentu," informa Doutór Mendes, Segunda (09/09/19) ba jornalista iha HNGV.

Doutór espesialista ne'e dehan, ninia parte kontinua esforsu hodi halo tratamentu. "Buat ida destinu ne'e, so Maromak mak bele hatene. So bainhira mak nia atu bolu ita. Ita ema nia servisu mak nafatin esforsu hodi halo tratamentu," Mendes hatete.

Doutór Mendes afirma, moras ne'ebé mak Padre João de Deus sofre mak hanesan multiple organ failure (falência de múltiplos órgãos) iha parte Pulmaun, Fuan, Riins, Sibilites Kronik (kanek iha ain), depois liga mós ho padre nia idade ne'ebé avansadu ona.

Entretantu, doutór espesialista Hong ne'ebé durante ne'e fó asistensia ba Padre João de Deus dehan, Padre João iha organika barak mak falla. Tan ne'e, doutór sira tenke halo tratamentu tuir faze ne'ebé mak iha.

Informasaun ne'ebé  www.tempotimor.com asesu, Padre João de Deus komesa baixa iha Hospitál Nasionál Guido Valadares iha loron 31 Agostu 2019.

Tempotimor (Díli) – Hahú husi loron 26 to'o 31 Agostu 2019, Unidade Emerjensia Hospitál Nasionál Guido Valadares (HNGV), rejista pasiente hamutuk 673.

Xefe Unidade Emerjensia HNGV, Lucia Celeste Amaral ba tempotimor.com, Tersa (03/09/19) hatete, númeru pasiente aumenta relasiona ho feriadu loron Konsulta Populár 30 Agusto.

"Pasiente ne'ebé tama iha emergensia durante 24 oras, mak hanesan kazu maternidade, asidente no mós kazu sira seluk," Lucia informa iha ninia knaar fatin, HNGV, Bidau, Díli.

Lucia dehan, iha periode ne'e, fatin iha sala emerjensia nakonu ho pasiente sira ne'ebé transfere husi klínika.

"Hospitál ne'e, hasoru impaktu bainhira halo registrasaun ba pasiente sira ne'ebé laiha karta transferensia, husi klínika ne'ebé sira halo tratamentu ba," Lucia haktuir.