Tempotimor (Díli) – Aban, Tersa (03/09/19) ekipa husi ASEAN to'o iha Díli. Ekipa ne'e, atu halo avaliasaun ba setor seguransa no polítika Timor-Leste nian. 

 

"Aban, ekipa ASEAN Fact Finding Mission (FFM) ba polítika no seguransa sei to'o iha Timor-Leste hodi halo avaliasaun no deskute ho lideransa sira, inklui mós tékniku liñas  ministeriais  kona-ba prosesu preparativus TL ba prosesu adezaun ba ASEAN," dehan Diretór  Jerál  Asuntu ASEAN, Ministériu Negósiu Estranjeiru no Kooperasaun (MNEK),  Jorge Camoes liuhusi Konferensi Imprensa iha salaun Institut Diplomata MNEK, Segunda (02/09/19).

 

Diretor Jerál ne'e afirma, adezaun Timor-Leste nian ba ASEAN ne'e importansia estadu nian. Tanba ne'e, ekipa téknika haka'as an hodi asegura adezaun TL nian ba ASEAN.

 

Nia afirma, adezaun TL ba ASEAN fó impaktu pozitivu boot ba Timor-Leste. "Ha'u hanoin ita nia adezaun ba ASEAN, ninia impaktu pozitivu ba ita nia rain," Camoes hatete.

 

Ekipa tekniku ASEAN ne'e hamutuk ema nain 60. Na'in 10 husi kapitál hamutuk ho sound lider no tékniku sira, ekipa husi Komite Permanente ASEAN ninian (CPA) iha Jakarta hamutuk na'in sanulu inklui mós ho tékniku sira, nomós Deputy Sekretáriu Jerál ASEAN ninian.

 

Bainhira ekipa ne'e to'o iha Timor-Leste, sira sei hala'o enkontru no avaliasaun ba preparasaun Timor-Leste nian, durante loron tolu nia laran. Hahú husi loron 4-6 Setembru.