Print this page

PLP ‘Kontra’ Gil Oan Soru Krítika Taur Laiha Kapasidade

By February 23, 2022 4351
Deputadu PLP, Noe da Silva 'Buka Tuir', Deputadu PLP, Noe da Silva 'Buka Tuir', Foto Suplay

Tempotimor (Dili)-Bankada Partidu Libertasaun Popular (PLP) iha Parlamentu Nasionál (PN) kontra membru Governu Gil da Costa Monteiro ‘Oan Soru’, husi Partidu Congresso Nacional de Reconstrução de Timor (CNRT), ne'ebè hola parte iha Governu daualu, krítika Primeiru Ministru (PM), Taur Matan Ruak laiha kapasidade.

“Iha pontu ida ha'u hakarak mós atu protesta de'it membru Governu balun, liliu señor Gil Monteiro ‘Oan Soru’ ne'ebé mak sai hanesan Sekretáriu Asuntu Veteranu ninian hanesan membru Governu ida, bainhira nia halo konsolidasaun partidu ninian hanesan Vise Prezidente ba Partidu CNRT, loloos nia hanesan membru do Governu ne'e, nia ba halo asuntu partidu nian labele tama iha Governu, ke nia to'o protesta Governu, primeiru ministru nia inkapasidade”, dehan Deputadu PLP, Noe da Silva "Buka Tuir" iha plenária PN, segunda (22/02).

Deputadu PLP ne'e lamenta tanba Vise Prezidente Partidu CNRT, Gil da Costa Monteiro ‘Oan Soru’ hanesan membru Governu ida, hola parte iha Governu daualu ida ne'e, hodi asume kna’ar hanesan Sekretáriu Estadu ba asuntu kombatente Libertasaun no Veteranu, maibé hamosu fali protesta ba Taur Matan Ruak.

“O hanesan membru Governu ida iha sensu ka la'e, loloos ne'e nia hanesan membru Governu ida nia protesta fali Governu, o nia responsabilidade ne'e iha ne'ebé, sé hanesan membru Governu ida”, hatete nia.

Durante iha atividade konsolidasaun partidu CNRT nian iha baze, Sekretáriu Estadu Oan Soru mós dehan durante mandatu Governu konstituisionál daualu nian mós la halo buat ida.

Maibé Oan Soru rasik la hatene-an katak problema boot ida iha de'it nia matan laran, hanesan veteranu sira-nia situasaun to'o agora la rezolve, inklui falsifikasaun dokumentu veteranu mós seidauk rezolve.

Tanba ne'e, nu’udar deputadu PLP la konkorda Oan Soru ba protesta fali membru Governu sira seluk, no ida ne'e kestionável tebes bainhira membru Governu ida halo hanesan ne'e.

Ba situasaun ne'e, bankada PLP hakarak hato'o agradese boot ba partidu CNRT ne'ebé mak sei hola parte iha Governasaun ida ne'e nia laran.

“Maibe ho atetude ida hanesan ne'e la podia tenke louva. Tanba sá ha’u hatete hanesan ne'e, nia membru Governu nia la'ós ema babain ida, ba protesta fali primeiru ministru iha konsolidasaun”, hatete nia

Kona-ba kestaun apoiu kandidatu Prezidente Repúblika (PR) 2022-2022 ida ne'e nia hakarak apoiu kandidatu sé de'it ne'e diretu, maibé hanesan membru Governu presiza tau nia-an hanesan governante ida.

‘Simples de'it, veteranu nia situasaun de'it ita-boot rasik la rezolve, falsifikasaun ba dokumentu veteranu sira de'it mak barak loos ita-boot la rezolve, ne'e responsabilidade sé nian, ita-nian ka la'e, depois ita mai kestiona fali Governu”, kestiona nia.

Antes ne'e, Deputadu Bankada Congresso Nacionál de Reconstrução de Timor (CNRT) iha Parlamentu Nasionál (PN), Domingos de Carvalho hatete, kona-ba Vise Prezidente Partidu CNRT, Gil da Costa Monteiro ‘Oan Soru’, ne'ebé okupa hela kargu Sekretáriu Estadu ba Asuntu Antigu Kombatente Libertasaun Nasionál no Veteranu iha Governu ida ne'e depende ba Primeiru Ministru (PM), Taur Matan Ruak atu hasai desizaun ikus kona-ba ezonerasaun.

“Kompeténsia Primeiru Ministru, atu hakarak hasai yeah hasai, tanba Oan Soru mós foin dadauk sai membru estrutura partidu CNRT iha nivél nasionál ninian, hanesan primeiru vise prezidente tuir kedas Maun Boot Xanana, ne'ebé kompeténsia iha Primeiru Ministru”, esplika nia ba www.tempotimor.com iha parlamentu nasionál, tersa (22/02). (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items