Print this page

KHUNTO ‘Defende’ Berta Hatene Portugéz, Prefere Uza Lian-Tetun iha Debate

By February 22, 2022 7626
Kandidatu Prezidente Repúblika 2022-2027, Armanda Berta dos Santos, ko'alia hela ho apoiuante sira. Kandidatu Prezidente Repúblika 2022-2027, Armanda Berta dos Santos, ko'alia hela ho apoiuante sira. Foto Tempo Timor

Tempotimor (Dili)-Prezidente Ekipa Susesu Kandidatu Prezidente Repúblika, Marito Magno defende kandidatu Prezidente Repúblika husi Partidu Kmanek Haburas Unidade Nasionál Timoroan (KHUNTO), Armanda Berta dos Santos, ne’ebé hatene ko’alia lian-Portugéz maibé prefere utiliza lian-tetun iha Debate entre kandidatu sira, atu fasilita eleitór sira komprende programa kandidatu.

“Se ko'alia Portugéz ami-nia kandidata mós hatene lian portugéz, maibé ami prefere sei uza lian-tetun, nune'e povu bele hatene liuliu ba militante sira, maske ita hatene lian-Portugéz lian ofisiál ba Timor-Leste”, dehan Marito iha salaun esperansa, Aimutin tersa (22/02).

Ba desizaun Komisaun Nasaun ba Eleisaun sira (CNE) ne’ebé sei halo programa debate iha loron 8 fulan-marsu, Kandidatu Berta Prontu debate ho lian oioin maibé preoridade uza lian-tetun fasilita povu, tanba povu maioria iha baze ladun komprende lian-portugéz.

“Ita hotu hatene katak, laiha obrigatóriu ida dehan tenke debate ho lian-portugéz no laiha lei tenke ser debate ho lian-Portugéz ne'e, ami nafatin manten posizaun no prinsípiu ho aprezenta debate ho lian-tetun, posizaun KHUNTO atu promove lian-tetun, tanba maioria ko'alia lian-tetun, di'ak liu ami ko'alia tetun para povu bele komprende ami-nia programa”, afirma nia.

Tanba laiha lei ida ne’ebé bandu ba Partidu KHUNTO atu debate ho lian-tetun, maske respeita nafatin lian-Postugéz hanesan lian ofisiál, maibé prefere lian identidade Timor nia, nune'e sidaun hotu bele komprende ho di’ak.

Ho ida ne’e, Partidu KHUNTO haruka karta ba CNE atu iha debate utiliza lian-tetun, tanba kandidatu Prezidente Repúblika 16 iha rua mak hatene Portugés, maske hatene Portugés mós, di'ak liu ko'alia ho tetun.

“Portugés ne'e ita uza ba halo lei, ba tribunál, maibé tribunál mós agora julgamentu ho lian-tetun, ha'u hanoin ami uza lian ida ne'ebé fasil”, deklara nia. (*)

Rate this item
(5 votes)
Last modified on Tuesday, 22 February 2022 21:12
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items