“En relasaun ho edukasaun, ha'u hanoin ami atu hatete de'it katak problema ne'ebé to'o oras ne'e seidauk iha lei funsaun públika, la bandu, foti funsionáriu públiku sira husi parte ida ba parte ida atubele sai xefia ou atu servisu iha fatin ida ne'eba. Maibé ami nota ida ne'e haruka ba atu nune'e halo balansu karik profesór sira mai husi eskola mai fali iha administrasaun entaun haree mós profesór seluk atu substitui fali profesór ne'ebé mak foti ona husi eskola ne'e mai iha Administrasaun”, dehan nia iha plenária PN, segunda (21/02).
Tanba meus ida ne'e bele mós sai hanesan promosaun ida ba profesór sira atu servisu iha fatin administrasaun tanba KFP rasik mós seidauk lei ruma atu bandu prosesu ida ne'e.
Ho ida ne'e, preokupasaun ne'ebé deputadu Partidu Demokrátiku, António da Conseição ‘Kalohan’, levanta kona-ba transferénsia profesór na'in-7 husi edukasaun ba servisu ho administrasaun edukasaun iha munisípiu balun, ida ne'e parte MAPKomS toma nota atu haruka ba ministériu relavante.
Maibé prosesu halo mudansa ba profesór ne'ebe mak parte edukasaun sira halo ne'e, bele mós iha impaktu tanba dala ruma ministériu la tetu didi'ak entaun impaktu ne'e sei akontese filafali ba eskola tanba profesór laiha atu hanorin estudante.
“Ami nota ida ne'e haruka ba atu nune'e halo balansu karik profesór sira mai husi eskola mai fali iha administrasaun entaun haree mós profesór seluk atu substitui fali profesór ne'ebé mak foti ona husi eskola ne'e mai iha Administrasaun”, afirma nia.
Deputadu Bankada Partidu Demokrátiku (PD), António da Conseição ‘Kalohan’ hatete, dadauk parte Ministériu Edukasaun Juventude no Desportu (MEJD) mós kestaun ba administradór sira, maibé nia hanoin importante tebes atu fó hanoin nafatin ba administradór sira atu haree importansia kona-ba setór edukasaun nian.
Tanba iha Postu Administrativu Lospalos, Munisípiu Lautein mosu transferénsia profesór hamutuk na'in-7 ba filafali servisu administrasaun edukasaun munisípiu nian, iha ne'ebé hamamuk tiha profesór iha eskola atu hanorin estudante sira.
“Ita sei iha hela problema ida mós atu haree kona-ba profesór kontratadu ou nesesidade mais rekrutamentu. Desvazia tiha filafali eskola hodi lori ba presta servisu administrasaun ida ne'ebé mak urjente liu, ida hanorin labarik mak presiza ka ida administrasaun mak presiza liu”, hatete nia.
Ho ida ne'e, Governu presiza asuntu importante ida ne'e atu nune'e informa ba ministériu atu tetu didi'ak, labele hamamuk eskola, nune'e estudante sira bele iha netik profesór sira hodi hanorin sira. (*)
