“Ha'u hanoin diskusaun ne'e naruk, la'ós de'it CNE maibé orgaun eleitorál ho STAE hamutuk no parlamentu mós diskute hela, soke ita-nia situasaun liliu kona-ba nasaun ida-idak hanesan Indonézia, ita iha kestaun legál iha diferente katak sira adopta mono warga negara katak sidadaun ida de'it”, esplika José Belo nia hafoin hasoru malu ho PR Lú Olo iha Palasíu Presidensiál Bairopite, segunda (21/02).
Nune'e husi parte CNE ho oragaun eleitorál nomós Parlamentu Nasionál halo ona diskusaun, maibé nasaun Indonézia nia sistema diferente ho Timor-Leste, ne'ebé entrega ba diplomata atu buka nia solusaun ho nasaun Indonézia.
“Indonézia nian situasaun, labele estabelese iha ne'ebá, tanba ne'e mak presiza mós ita-nia diplomata sira, liliu nivél polítika sei halo hela konsetrasaun karik se la'ós agora, maibé tempu naruk nia laran sira bele diskute hela ne'e tanba kestaun legál”, katak Presidente CNE.
Tanba ne'e fó tempu ba Ministeriu Negósiu Etranjeiru Kooperasaun (MNEK), atu haree situasaun sira ne'e, bele hetan nia solusaun hodi estabelese resensiamentu iha Indonézia.
“Ha'u hanoin ita-boot sira hatene katak, iha konstitusaun mak haruka dehan fatin ne'ebé atu estabelese sentru votasaun atu aplika tenke resensiamentu, Austrália foin lalais ne'e la'ós tanba parte Timor mak lakohi maibé, tanba sira-nia pandémia, sira-nia regra internál ne'ebé forte tebe-tebes sira la fó biban atu ita halo resensiamentu”, esplika nia.
Maske Estadu Timor-Leste hakarak halo reseniamentu iha nasaun ne’ebé de’it, maibé iha Eleisaun Prezidensiál konsege loke de’it sentru votasaun iha Korea, Inglatera, no Portugal atu sidadaun Timoroan sira tuir vota.
“Ita hakarak estabelese iha ne'ebé de'it, importante tenke resensiamentu, se laiha resensiamentu ita labele halo buat ida, tanba ne'e mak iha de'it Korea tanba ita halo resensiamentu iha Inglaterra ho Portugál ita iha resensiamentu”, esplika nia.
Dadauk ne'e esforsu Diplomata Timoroan sira liuhusi embaxadór no adidu sira buka solusaun ne'ebé di'ak entre Indonézia ho Australia bele estabeleese reseasementu ne'e.
“Sira ne'ebé mai la'ós dehan labele iha oportunidade maibé prosesu ne'e sei la'o hela, aban bainrua bainhira iha ona solusaun ne'ebé di'ak no hothotu iha konkordansi Estadu, ha'u hanoin ida ne'e ita sei bele estabelese”, deklara nia.
Bainhira laiha solusaun depende ba polítika oinsá bele fasilita sidadaun Timoroan sira iha Indonézia atubele mai tuir vota, ne'ebé haree mós situasaun iha nasaun refere bainhira ladi’ak labele obriga, kumpre mós ema nia lei.
“Ha'u hanoin situasaun ida ne'e entremu ita-nia autoridade sira sei buka hela solusaun ne'ebé di'ak, ne'e la’ós tenke lalais, ita presiza tempu atu haree oinsá atu solusaun di'ak ba aban bainrua la'ós de'it agora, maibé tempu naruk ne'ebé ita ho relasaun Indonézia tenke hametin nafatin”, hatete nia.
Entretantu númeru eleitór iha Australia totál hamutuk 1.487 ne'ebé sei la konsege ezerse sira-nia direitu ba vota iha eleisaun prezidensiál iha loron 19 marsu 2022. (*)
