“Konsidera katak hanesan kandidatu independente ne'ebé mai ho rekursu mínimu finamseiru e mós rekursu umanu, barak liu ami sei meius hanesan diálogu komunitáriu hasoru komunidade sira ko'alia ida ne'e meiu ida ne'ebé ke ami sei uza e mós aproveita espasu mediátiku katak, mídia sosiál kanál mídia sira ne'ebé ami hato'o ami-nia opiniaun”, dehan Lamukan ba jornalista sira iha Tribunál Rekursu, Kaikoli, kinta (17/02).

Desizaun ne’ebé foti, tanba rekursu limitadu ne'ebé sei la mobiliza massa atu halo kampaña iha situasaun pandemia Covid-19 ne’ebé la'o hela entaun evita mós aglomerasaun massa iha baze.

“Sim, ami halo door to door komunikasaun durante ne'e mós ami la'o hela kuandu ofisialmente Tribunál fó sai ona kontinua ba fatin sira ne'ebé mak ami seidauk ba”, nia afirma.

Ba oráriu ne'ebé mak sei halo uluk kampaña eleitorál mak hahú husi Rejiaun Autonomia Espesial Oekussi Ambeno (RAEOA).

“Ami planu sei ba uluk Oekussi mais ami sei buka atu konjuga ho oráriu CNE (Komisaun Nasionál ba Eleisaun sira) nian tanba ami sei hatama oráriu ba CNE maibé ami-nia preferénsia ne'e atu hahú iha Oekussi”, hatutan nia.

Ho desizaun hili Oekussi ba atividade kampaña dahuluk nian, tanba hela dook husi Dili, hanesan ema bolu rai ki'ik iha hahú ho husi ne'ebá hahú husi fronteira ne'e mak tama mai iha rai boot e mós tanba tempu limitadu, tanba iha rai boot bele la'o loron la'o kalan no fásil liu.

Matéria ne'ebé mak kandidatu ho númeru 12 ne'e sei foku liuba juventude sira atubele envolve iha dezenvolvimentu Timór nian hahú agora ba futuru.

“Matéria kampaña barak liu mak fahe pamflitu ho konteudu bazeia ba ami-nia moto ba Timor-Leste ida fraternu liu nomós halo juventude sai foku sai sujeitu ba dezenvolvimentu oinsá mak prezidente uza kompeténsia atu komunika ho Governu atu tau atensaun ba dezenvolvimentu povu nia moris di'ak nomós ba juventude nian”, esklarese nia.

Ekipa susesu ne’ebé hala’o servisu ba kandidatu ho voluntáriu, ne'ebé dadaun ne'e preparadu ona, no indentifika ona Munisípiu potensiál sira hodi halo kompaña eleitorál liuhusi diálogu komunidade sira ka halo door to door. (*)