“Ita sei imprime buletin votu porvolta 900.000 no sei hahú imprime iha dia 24 no 25 fevereiru e tempu ikus grafika tenke hato’o ba STAE mak entre dia 10 no dia 11 fulan-marsu nune'e hamutuk ho materiál sira seluk sei transporta ona ba 12 Munisípiu no Oekussi inklui nasaun haat ne'ebé mak sei realiza eleisaun prezidensiál”, dehan nia iha Tribunál Rekursu Kaikoli, kinta (12/02).

Nune'e kalkulasaun orsamentu ba eleisaun prezidensiál tinan 2022 hamutuk millaun $9.3, maibé nia jestaun hamutuk ho Ministériu Finansas hodi prepsaun ba eleisaun prezidensiál.

Tanba situasaun pandemia Covid-19 nune'e aplikasaun orsamentu ne'e sei prepara mós ba sasán saúde nian hanesan sanitazer, luvas no seluk ne'ebé sei presiza.

“Ita hotu hatene katak materiál votu bele sensitivu, no ho kuantidade ne'ebé mak boot, no ita-nia hakarak mak tenke ho kualidade ne'ebé di'ak tuir espesifikasaun ne'ebé mak kontenpla iha lei eleisaun prezidensiál, Governu indika insititu públiku gráfika nasionál mak sei assume responsabilidade hodi produz ka imprime buletin votu tantu ba primeiru volta no segundu volta”, afirma nia.

Tanba iha loron 9 fulan-fevereiru reuniaun Konsellu Ministru deside Rezolusaun Governu fó ona autorizasaun ba Sekretariadu Tékniku Administrasaun Eleitorál (STAE) hodi hahú prosedimentu aprovizionamentu nian liuhusi ajuste diretu no define ona katak produsaun ba boletin votu sira ne’e sei hala’o husi Imprensa Nasionál Timor-Leste nian.

“Ba akizisaun buletin votu nian ne’ebé sei utiliza ba eleisaun prezidensiál tinan 2022. Haree ba urjénsia iha akizisaun boletin votu nian ne’ebé nesesáriu ba realizasaun eleisaun Prezidente Repúblika nian”, dehan Ministru Prezidénsia Konsellu Ministru, Fidelis Leite Magalhães, iha Palásiu Governu.

Eleisaun Prezidensiál ba tinan 2022 sei realiza iha loron 19 fulan Marsu ho iha kandadutura hamutuk 16 ne'ebé define ona atubele komkore. (*)