Tuir informsaun ne’ebé fó sai husi STAE Munisípiu Dili, sesta (11/02) katak, Sentru Votasaun ne’ebé loke ba Eleisaun Prezidensiál ne'ebé sei akontese iha loron 19 fulan-marsu tinan 2022.
“Parte leste lokaliza iha STM Bekora sei akumula eleitór husi munisípiu Baukau, Lautein, no Vikeké. Parte sentru lokaliza iha GMT-Kaikoli akumula eleitór husi Manatuto, Likisá Aileu, Ermera no Ataúru, no Oeste iha INAP-Komoro sei akumula husi munisípiu Ainaro, Bobonaro, Covalima, Manufahi no RAEOA", dehan Diretór STAE Munisípiu Dili, Mariano de Deus liuhusi sirkular ne’ebé www.tempotimor.com asesu iha kuarta (16/02).
Antes ne'e, Prezidente Komisaun Nasionál Ba Eleisaun sira (CNE), José Agostinho da Costa Belo hatete, Komisaun Nasionál Eleisaun (CNE) no Sekretariadu Tékniku Administrasaun eleitoral (STAE) sei instala sentru votasaun paralelu tolu (3) iha kapitál Dili hodi fasilita estudante husi munisípiu ne'ebé hela iha Dili, nomós sidadaun sira ne'ebé hein família moras iha ospitál.
“Ami konvida de'it autoridade lokál husi munisípiu Dili nian, inklui mós ministériu relevante sira, tanba sei estabelese sentru votasaun paralelu ne'ebé atendementu ba liu ita-nia sidadaun sira ne'ebé mai husi munisípiu, liliu estudante sira mai husi munisípiu iha Dili ho tan sira ne'ebé akompaña ita-nia maluk sira iha ospitál, negosiante sira, iha tempu eleisaun posibilidade sira sei la fila ba sira-nia fatin tanba kestaun transporte nomós aspektu ekonomia”, dehan nia iha salaun Laline Larigutu Kolmera, sesta (28/21).
Tanba lei fó solusaun ba sidadaun atu rejistu iha Dili, liliu iha fatin sira ne'ebé STAE preprapara ona, atu fasilita sira lalika ba fali munisípiu, segundu sira bele iha tempu atubele fó sira-nia votu no asidente sira ne'ebé mosu iha tinan hirak liuba bele evita. (*)