Sekretáriu Estadu Komunikasaun Sosiál (SEKomS), Mericio Juvinál dos Reis ‘Akara’ hatete, diálogu ne'e iha interesante entre sosiedade sivíl ho Governu, tanba sosiedade sivíl parseiru estratéjiku Governu nian, no sira mak tau matan ba Governu hanesan lala'ok Governu hodi la'o.

“Ha'u espera ho diálogu sira ne'e iha regular atu komunikasaun sosiedade sivíl ho Governu ne'e la'o di'ak no bele ajuda sira-nia advokasia hodi tulun Governu”, dehan Mericio Akara ba jornalista hafoin diálogu ho ONG sira iha salaun FONGTIL, Kaikoli, tersa (15/02).

Ba edukasaun sivika kontestu ida ne'e atu fó konsénsia no informasaun di'ak ba sidadaun sira bele partisipa ativu iha eleisaun, tanba atu hili líder nasionál presiza iha partisipasaun nomós edukasaun oinsá mak sidadaun ida-idak hatene nia direitu.

Diretór Interinu FONGTIL, Helio Dias da Silva hatete, diálogu ne’ebé hala’o ko'alia kona-ba situasaun polítiku rai laran no informasaun ne'ebé espalla iha mídia sosiál.

Tanba liuhusi diálogu ne'e Sosiedade sira bele halo parseira ho Governu hodi bele espalla informasaun ba públiku ho loloos.

Dadaun ne’e, FONGTIL halo ona koordenasaun ho Komisaun Nasionál ba Eleisaun sira (CNE) katak, sosiedade sivíl sei sai hanesan observadór ba eleisaun ne'ebé sei mai, no membru FONGTIL iha 250 ne'ebé namkari iha NGO nasionál internasionál no lokál.

“Daudaun ne'e ami alista hela sira ne'ebé servisu iha NGO atu sira bele hetan kartaun obrservasaun ba ita-nia eleisaun ne’ebé sei akontese iha fulan oin mai, tanba iha kalendáriu dekretu lei kona-ba prosedura no oráriu ba Eleisaun nian no ami sei hahú halo konsolidasaun ba prosesu kampaña”, informa nia. (*)