Deputada CNRT, Vergína Ana Belo hatete, membru Governu ne’ebé prestasaun servisu ladi’ak hanesan Ministériu Obras Públika (MOP) Ministériu Planu no Ordenamentu (MPO) no Ministériu Finansas (MF) bele hasai husi estrutura Governu hodi troka fali ema seluk.
“Tuir mai ha’u mós hakarak husu, se situasaun ne'ebe Xefe Governu hato'o, ha'u sujere halo remodelasaun, hasai tiha membru Governu sira ne'e, sé sente katak labele servisu hamutuk ona”, dehan deputada Vergína Ana Belo iha plenária PN, tersa (15/02).
Tanba kaer ba Xefe Governu ninia lamentasaun ho preokupasaun ne'e ministériu tolu trava hela dezenvolvimentu iha rai laran, siknifika pedidu husi deputadu sira kona-ba estrada sira ne'e sei laiha rezultadu tanba ministériu nia prestaun servisu la di’ak.
Ho ida ne'e husu ba Primeiru Ministru atu remodela membru Governu sira ne'e, ikus mai ema labele hatete fali dehan, Primeiru Ministru atual kuandu halo kampaña iha tinan 2017 dehan estrada sira iha Timor laran tomak kondisaun ladi’ak.
“Ne'ebé favór ida se Primeiru Ministru sente labele ona, remodela, hasai balun, hatama fali balun, ne'e ha'u-nia sujestaun de'it”, afirma nia.
Deputada CNRT hakarak ko’alia asuntu ne'e tanba iha semana kotuk husu atu ateru rai ba estrada, ka pengarasa ida ho kualidade, maibé agora la'e ona, tanba kaer ba Primeiru Ministru ninia lamentasaun no preokupasaun.
“Tanba atu halo pengerasa de'it labele ona, atu nahe tan alkatraun farrá-mais, ita dehan laiha kualidade mais iha kualidade ba estrada sira agora ne'e, se ha'u hatete dehan laiha kulidade ha'u tenke halo komparasaun ho ida iha kualidade ne'e, bee ida atu halo komparasaun laiha ne'e ha'u atu dehan saida”, hatete nia.
Antes ne'e, Primeiru Ministru (PM), Taur Matan Ruak kritika maka’as Ministériu Obras Públika (MOP) Ministériu Planu no Ordenamentu (MPO) no Ministériu Finansas (MF) ne’ebé hatudu prestasaun servisu ladi’ak impede dezenvolvimentu no rekupera infraestrutura iha tinan 2020 no 2021.
“Ha'u la hatene iha Diretór Jerál iha Obras Públika nian, planu ordenamentu nian, Ministériu Finansas nian, ha'u ko’alia instituisaun tolu ne'e tem haver ho fundu infraestrutura, fundu infraestrutura ninia prestasaun la di'ak iha tinan kotuk pursentu ruanolu-resin-neen (26%) Planu Ordenamentu, Obras Públika, dada malu tun sa'e ADN (Ajensia Dezenvolvimentu Nasionál) tama tan, aprovizionamentu tama tan, dezastre naturál 2020 no 2021 seidauk rekupera hotu”, dehan Taur bainhira nia halo enkontru ho nível Diretór Jerál sira iha Salaun Ministeriu Finansas, Aitarak Laran, segunda (07/02).
Primeiru Ministru preokupa situasaun ne’e, tanba tauk Ministériu relevante sira laiha vontade atu haree assuntu infraestrutura sira.
“Hodi bainhira iha Konsellu Ministru ha'u dehan, ha'u tauk este Governu vai deixar as infraestrutura em pior doque recebeu, ha'u tauk ke ita-nia rapidez laiha demora, estuda, dada tun dada sa'e ita husik hela infraestrutura ida pior liu fali kuandu ita tama”, afirma nia.
Tanba ne’e, Ministériu relevante sira tenke halo esforsu tau matan ba rapidez ho sira seluk tenke lalais, ho planu no programa ba tinan ida tenke halo kedan no labele dada fali.
“La rai ba aban, buat ne'ebé ohin nian ita tenke halo, matabisu tenke hán matabisu ita-boot rai tan meudia nia ai-hán iha fali ona, matabisu rai halo saida?. Entaun para ida ne'e, metodolojia de traballu ne'e supervizaun, planu ne'e importante uluk”, hatete nia. (*)
