“Foin lalais iha inisiu fulan-dezembru, mosu Ró Berlin Ramelau mai, labele halo atividade ba Ataúru e ha'u lee notísia ida hatuun katak, Ministru Transporte hasoru ho Primeiru Ministru hatete dehan katak Ró Berlin Ramelau ema balun atu privatiza tiha, ha'u kuandu lee notísia ne'e ha'u hakfodak, hebat sekali, ema ida atu privatiza fali sasán Governu nian”, dehan deputadu Ricardo Batista iha plenária, segunda (14/2).

Ba kazu ne'e husu Ministru Transporte no Komunikasaun (MTK) atu labele halimar ho ema ne'ebé privatiza Berlin Ramelau, no tenke buka tuir autór ne'e hodi responsabiliza ba nia atetude.

Tanba Governu enfrenta hela polémika mak hamosu tán fali polémika seluk, ida ne'e sei labele rezolve problema ruma.

“Se buat ne'e mak tebes, husu Ministru keta halimar, tenke buka tuir e lori ema ne'e para ba responde (bertangung jawab) ba ninia atetude ne'e, labele hamosu fali polémima”, hatete nia.

Bankada CNRT husu Governu liliu MTK atu fó sai ema ne'ebé mak privatiza, tanba públiku tomak mós hatene katak orsamentu ba konstrusaun Ró ne'e la'ós Governu Timor-Leste nia de'it, maibé mós hetan apoiu husi nasaun Alemaña.

“Ne'ebe husu ba ita-boot sira, atu lalais bele rezolve problema Ataúru nian, e fó hatene sai mós se mak atu privatiza Ró Ramelau ne'e”, dehan nia.

Bankada CNRT mós hakarak fó hatene ba Governu katak Ró pasajeiru ba Ataúru kuaze tinan 3 la la'o, tanba Ró Nakroma para iha tasi laran tinan 3 ona la rezolve.

“Uluk hau hatete tiha ona katak Ró ne'e se bele karik ita leilaun tiha, mais ba deputadu Governu balun dehan katak lelaun ba ha’u mak sosa fali”, hatete nia.

Tanba Ró Berlin Nakroma ne'ebé tinan tolu para de'it iha tasi laran, ida ne'e halo Estadu Timor-Leste mak moe fali, karik laiha ona osan atu rezolve problema ida ne'e, di'ak liu halo lelaun duke para de'it tasi ibun.

“Tinan tolu, Ró Berlin Nakroma para hela de'it, nia problema ne'e saida loos mak to'o agora labele resolve”, afirma nia.

Ba kestaun ne'e Ministru Asuntu Parlamentár no Komunikasaun Sosiál (MAPKomS), Francisco Martins Jerónimo hatete, kona-ba problema Ró pasajeiru ba Ataúru, Governu rejista no sei hakerek karta ba Ministériu Transporte no Komunikasaun (MTK) atu buka solusaun no haruka mós karta resposta ida mai Parlamentu Nasionál. (*)