Deputadu Bankada CNRT, Arão Noe Amaral hatete, iha loron 10 to’o 11 fulan-janeiru 2022, Primeiru Ministru, Taur Matan Ruak, halo vizita ida ba Munisípiu Manufahi no promete hela atu hadi'a ponte Abá-tú maibé realidade to’o agora seidauk realiza.

“Kona-ba ponte ki'ik oan ida ne'ebé atu tama ba Same Vila, kotu kuaze fulan ida resin ona, e naton vizita sua eselénsia Primeiru Ministru nian ba ne'ebá, haree rasik ponte ne'e, e promete dehan depois de fila mai, mákina ba kedas atu hadi'a, maibé relidade agora ponte ne'e difikulta teb-tebes”, dehan Arão iha plenária Parlamentu Nasionál, segunda (14/2)

Dadauk, ponte Abá-tú ne'ebé mak liga ba Same villa ne'e, ho medida luan metru 6, no naruk metru 4, maibé sai tiha ona fatin hanesan merkadu ida, tanba bainhira komunidade sira sai husi Villa mai tenke hatuun sira-nia sasan ne'e lalin fali mai mota sorin, hafoin bele ultrapasa.

Ho komprimisu, Primeiru Ministru nian, mak CNRT hein katak Ministru Obras Públika (MOP) bele fó atensaun ba asuntu ne'e, hanesan karater emerjénsia ida, atu rezolve ponte refere.

Bankada CNRT Preokupa tanba problema ponte ne'e ki'ik, maibé fulan ida besik atu ba rua ona, difikukta teb-tebes populasaun ninia movimentu.

“Ha'u hanoin katak ho ha’u-nia informasaun ne'e bele fó hanoin no relembra filafali ba promesa ne'ebe seu Primeiru Ministru rai hela iha momentu ne'eba kuandu ba vizita Manufahi iha fulan kotuk liubá, dehan katak atu mobiliza ekipamentu ba hadi'a mais to'o agora seidauk hadi'a”, dehan nia.

Deputadu bankada FRETILIN, Dario Madeira hatete, nia parte sekunda ho deklarasaun husi Deputadu Arão nian kona-ba ponte Abá-tú iha Suku Letefoho, tanba momentu kuandu ba ne'eba komunidade sira mós levanta preokupasaun ida ne'e ba deputadu sira.

“Ha’u sekunda mós Arão Noe kuandu ko'alia kona-ba ponte oan ida iha Same Vila, Komunidade sira iha same ne'e, iha momentu kuandu ami ba, sira ko'alia duni buat ida ne'e, Primeiru Ministru mai promete, e komunidade triste”, hatete nia.

Iha semana kotuk mós deputadu sira ba duni iha ponte Abá-tú, realidade hatudu deputadu sira hein kuaze oras rua resin atubele liubá Same Villa.

Ponte Aba-tú ne'e lokaliza iha aldeia Rai-úbu, suku Letefoho, Postu Administratívu Same, no ponte ne'e rasik hetan estragu husi udan-boot ne'ebé akontese durante loron-rua tutuir malu, hahú iha kuarta (05/01) to’o kinta (06/01).

Tuir informasaun ne'ebé www.tempotimor.com asesu iha pájina ofisiál autoridade Munisípiu Manufahi katak, konstrusaun ba ponte refere agora dadauk besik filafali normál tanba hetan tulun husi enprezáriu ida iha Manufahi hamutuk ho funsionáriu públiku iha administrasaun postu no munisípiu ne'ebe tun direta ba hadi'a, kada loron sábadu ho domingu.

Ba prosesu konstrusaun ne'e, enprezáriu Manufahi oan kontribui materiál hanesan sumente, fatuk, raihenek, kerikil hodi konstrui ponte rerere. (*)