“Prioridade ha'u-nia kandidatura hanesan ne'e, tenke iha reforma ekonómiku no reforma justisa”, dehan nia iha salaun CNE, Kolmera, sesta (11/02).

Tanba ko’alia kona-ba reforma ekonomiku ne'e Timor-Leste hanesan nasaun independente, hakarak avansa ba oin, maibé dala ruma ema dehan Prezidente Repúblika ne'e ba tesi fita de'it labele halo servisu Governu nian, ne'e laloos.

Iha akordaun ne'ebé mai husi Tribunál Rekursu, bazeia ba análiza konstituisaun iha loron 14 fulan-jullu tinan 2010, iha ne'eba hatete, Prezidente Repúblika sempre iha poder inzerénsia ho natureza ezekutivu, siknifika Prezidente ne'e bele mete mós asuntu balun Governu nian.

Tanba ne'e kandidatura atu fó nia programa saida mak di’ak ba povu, no bele fó kréditu ba eskola, ida ne'e mak programa sei hato’o iha kampaña eleitorál.

“Se ita ba prezidente repúbliku, ita manán karik ita sei ko’alia ho Governu haree tok programa di’ak ruma ne'ebé mak iha entermu de edukasaun bele benefisia ema”, hatete nia.

Nu’udar kandidatura Prezidente Republika rejeita atu halo kampaña eleitorál hodi insulta malu tanba laiha benifisiu ba povu.

“Ita tenke obedese, tanba ne'e simples ita lakohi atu viola aktu ilísitu ne'ebé mk konsagra ona iha lei, ita tenke ba konsulta lei antes ita halo kampaña eleitorál”, esplika nia.

Maske lei permite halo kampaña eleitorál maibé labele insulta ema, labele halo destruisaun ba eleitorál sira husi kandidatu sira seluk nian, labele mós kria dezentendimentu iha sosiedade, labele más kampaña liu oras.

“Kampaña ne'e hahú husi oras tuku 8 to'o tuku 18 ho balun, labele tuku 10 kalan ita la'o dor-to-dor hela. Depois lei mós bandu purzemplu, loron rua antes votasaun ita tenke para ona”, afirma nia.

Durante loron rua ne'e mak iha kandidatu balun la'o ba ema nia uma konsulta ema atu vota ninia kandidatura ida ne'e viola lei, tanba loron rua ne'e lei fó atu ema hotu tur hanoin oinsá mak deside sé mak sira hakarak atu fó votu.

“Ha’u-nia hanoin komprende lei importante, se la komprende lei konsulta”, esplika nia. (*)