“Ita sei la uza meius atu hatun ema seluk hodi explora povu nia konfiansa. Ha’u-nia kompromisiu katak ba kandidatu sira ha'u sei respeita no sei la akuza no defama sira”, dehan Verigilo hafoin partisipa Forum diálogu ho tópiku (sansaun no penalti ba aktu irregularidade ne'ebé komete husi kandidatu PR iha ámbitu eleisaun Prezidente Repúblika) ne'ebé realiza husi Forum Organizasaun Noun Govermentál Timor-Leste (FONGTIL), iha salaun CNE, Kolmera, sesta (11/02).

Nu’udar kandidatu promete sei la uza meiu sira hanesan hatun malu, akuza ka defama kandidatu, maibé buat ne'ebé nia sei uza mak atu protesta katak saida mak bele halo bainhira eleitu sai Prezidente Repúblika.

“Hanesan kandidatu prezidente repúblika tenke kompromisiu pesoál mak saida?, ha’u sei ko'alia no saida mak ha’u halo durante tempu kampaña”, dehan nia.

Dadauk moto ne'ebé mak prepara husi kandidtura Vergílio mak sita Fraternidade katak tenke haree malu hanesan inan-feton no maun-alin no labele loke oportunidade atu hatun malu iha prosesu kampaña.

Ba kestaun seluk mak étika, ne'e mak buat balun ne'ebé mak bele konkorda hamutuk maibé laiha ema ida atu halo tuir no ikus mai viola, laiha sansaun ruma.

“Ita iha sansaun maibé barak liu mak sansaun sosiál barak liu duke sansaun legál. Sansaun sosiál katak ne'e ema politika nian ka ema mak hili nia maibé la iha sansaun legál ruma hanesan prizaun ka Multa”, hatete nia.

Vise Prezedente Komisaun Nasionál ba Eleisaun sira (CNE), Domingos Barreto hatete, dadauk iha ona regulamentu balun ne'ebé hakerek iha dekretu Governu no fó sai mós iha kódigu penál iha artigu 229 to'o artigu 243 ne'ebé ko'alia kona-ba krime eleitorál sira.

“Krime ne'ebé mak akontese iha faze kampaña, faze votasaun, faze kontajen no iha faze apuramentu lori sasán sira ne'e mai iha Nasionál”, esplika nia.

Tanba haree ba kazu krime no aktu sira ne'e dala ruma mós bele akontese (unsu-unsur), no bainhira identifika ida ne'e mak sei implementa tuir lei ne'ebé mak vigora.

Ba ida ne'e, CNE mós halo ona liña koordenasaun ho Polísia Nasionál Timor-Leste (PNTL) oinsá mak atu implementa lei ne'e.

“Liña koordenasaun ami halo ona ho Ministériu Públiku no Tribunál no CNE mós sei halo enkontru ho Komandante Polísia iha Munisípiu 12 inklui RAEOA iha atubele halo perparasaun no koordenasaun ne'ebé di'ak liután”, haktuir nia.

Ba Krime eleitorál ne'e mak hanesan ema halo impedementu no perturbasaun ruma ka saida de'it iha tempu Kampaña ka tempu votasaun ida ne'e regula hotu iha kódiku penál.

Aleinde, CNE sei toma medida hahú loron 02 to'o 16 iha tempu Kampaña atu evita problema sira ne'e labele mosu.

Iha ne’e CNE mós husu atu Kandidatura sira atu labele insulta malu maibé hatudu sira-nia figura ne'ebé di'ak durante tempu kampaña. (*)