“Grupu Amigu JB Funulitik iha komitmentu atu kontinua fó apoiu ba Partidu CNRT iha eleisaun Parlamentar, liliu pesoál Maun Boot Kay Rala Xanana Gusmão hodi eleitu ba Premeiru Ministru 2023-2028, no deside sei fó apoiu ba Maun Horta hodi sai Prezidente Repúblika períodu 2022-2027”, dehan Responsável Másimu Grupu Amigu JB Funulitik, Carolino de Oliveira iha Sede Ekipa Susesu Kandidatu José Ramos Horta, Hudi Laran, sábadu, (12/02).
Grupu Amigu JB Funulitik apoiu Xanana-Horta haree katak, husi kedas 2018 to'o ohin loron, moris iha inserteza iha ámbitu polítiku, sosiál, ekonómiku no kultura nu'udar konsekuénsia husi impase polítiku ida ne'ebé naruk, remata ho violasaun prinsípiu Estadu Direitu Demokrátiku, no la respeita valór demokrasia nian.
Ba Konsekuénsia husi hahalok ida ne'e konsege hamosu efeitu negativu kona-ba vida sidadaun hothotu, ho ida ne'e grupu amigu JB FunuLitik iha komitmentu atu fó apoiu ba líder na'in-rua José Ramos Horta no Kay Rala Xanana Gusmão ne'ebé iha kapasidade atu hadi'a rai ne'e.
Grupu Amigu JB Funulitik mós fiar katak eleisaun prezidensiál iha loron 19 fulan-Marsu 2022 sei hatudu rezultadu ida ne'ebé mak bele kontribui hodi tau hikas fali orden demokrátiku no hamosu traisaun foun luta ba poder.
“Ho ida ne'e, bainhira povu fó fi'ar ba Maun Boot Ramos Horta eleitu sai Prezidente Repúblika mak, ami Grupo Amigo JB Funulitok propoin ba maun Horta foti desizun ruma labele viola konstituisaun no tau hikas orden konstituisaun iha nia fatin, hadi'a hikas Timor-Leste nia naran iha mundu hetan konfiansa husi nasaun amigu sira hodi loke kampu traballu ba joven sira iha Timor-Leste”, hatete nia.
Aleinde ba eleisaun parlamentar nian, karik povu fó fiar ba partidu CNRT liliu pesoál Kay Rala Xanana Gusmão hodi asume kargu Premeiru Ministru, Grupu Amigo JB propoin loke kampu traballu ba Joven sira.
Nune'e mós tau orsamentu ne'ebé dignu ba edukasaun, hadi'a fasilidade saúde, dada bee-moos ba komunidade sira, inklui dada kadoras greater sunrise mai Timor-Leste hodi fó servisu ba povu.
Pozisaun Grupu Amigu JB Funulitik mós husu ba Xanana Gusmão, no Ramos Horta atu hadi'ak hela situasaun iha rai laran molok entrega ba Joven Kontinuadór sira.
“Ami defende-repozisaun orden konstitusaun ho konsolidasaun Estadu Direitu, Demokrátiku liuhusi elisaun Prezidensiál tinan 2022 no eleisaun Parlamentar oin mai", dehan nia.
Grupu Amigu JB Funulitik hanesan Grupu independente ne’ebé deside fó apoiu ba José Ramos Horta no Kay Rala Xanana Gusmão, atu avansa iha eleisaun Prezidensiál no Parlamentar. (*)
