“To'o agora ha'u laiha partidu ida apoiu ha'u, tuir lei mak ha'u rejista iha Tribunál de Rekursu, ha'u hanoin Partidu iha nia desizaun rasik, e ha'u hanesan kandidatu independente, ha'u hanoin ne'e ba partidu hothotu, la'ós ba partidu PLP, se partidu balun ne'e, sente ha'u kandidatu ke sira bele tau fiar, eskolla ha'u sai sira-nia kandidatu ou apoiu”, dehan Isabel Ferreira iha Casa Sidadania, Kolmera, segunda (31/01).

Maske nia kandidatu independe maibé nia parte mós nakloke ba partidu sira seluk ne'ebé interese hodi fó apoiu nia hodi kompete ba eleisaun prezidensiál períodu 2022-2027.

"Ha'u hakarak uza palavra militár nian, ita prepara ba di'ak mós, iha nomós iha ba buat aat, ne'ebé ha'u hanoin iha eleisaun ne'e depende ba povu, povu mak sei determina, se mak di'ak liu, entre kandidatu sira”, afirma nia.

Tanba ne’e, lakohi halo kompromissu barak maibé nia parte ko'alia de'it katak, hahalok mak sei hatudu sai nia kompromisu ida.

“Estratéjia ita hotu hanesan depende filafali ba ita-nia hahalok, ita-nia kompromisu ne'ebé ita bele dehan ita bele halo, labele dehan ita la halo, ha'u-nia mak sai ha'u-nia kompromisu”, nia promete.

Funsaun Prezidente Repúblika ba Isabel Ferreira mak funsaun ida nobre no folin-boot liu, tenke ezerse, nafatin, iha momentu hotu maske iha difikuldade no dezafiu, ho koresaun hodi reforsa no konsolida Estadu Direitu Demokrátiku, emfavór ba ema, ba sidadaun feto no mane.

"Hanesan Prezidénsia Proximidade, sensivél liuba terus família sira-nian, fó atensaun liuba difikuldade ema no komunidade sira-nian, laran nakloke liuba sujestaun sira ne'ebé mai husi sosiedade, disponível liu atu hetan solusaun, iha Gabinete Prezidensiál nia li'ur, ba hamutuk ho povu, iha aldeia, iha suku, iha postu administrativu, iha Munisípiu no iha rejiaun sira”, hatete nia. (*)