Prezidente Ekipa Susesu Kandidatura Prezidente Repúblika (PR) husi Partidu KHUNTO, Marito Magno hatete, husi kandidatu Armanda Berta dos Santos ninia ekipa susesu ne'ebé reprezenta kandidatura, kompleta ona dokumentu ne’ebé seidauk kompleta tuir lei.
"Sim rejistu ona, ita hein notifikasaun Tribunál tuir lei haruka no prosesu ba oin hodi hetan desizaun husi Tribunál kandidatu ne'ebé mak sei kompete iha eleisaun Prezidensiál", dehan Marito iha Edifísiu Tribunál Rekursu, Kaikoli, segunda (31/01).
Kona-ba lista proponente mantein rihun-8-resin ne’ebé preparadu hodi hahú kampaña iha loron 2 fulan-marsu tuir planu abertura iha Munisípiu Ainaro.
"Pursentu 100 ami la dúvida, ami fiar metin ho forsa polítika ho organizasaun filiadu, ita-nia povu, ita-nia komunidade iha rai laran ho rai liur mós apoiu ba kandidata Armanda Berta dos Santos", informa nia.
Ho dokumentu ne'ebé hatama ona iha Tribunál Rekursu, ekipa susesu partidu Kmanek Haburas Unidade Nasionál Timor Oan (KHUNTO), fiar katak sei laiha failansu.
"Karik iha buat ruma husi parte Tribunál Rekursu sei notifika ami atu kompleta, maibé ami fiar katak ami-nia preparasaun di'ak ha'u hanoin katak sei laiha failansu", afirma nia. (*)