“Propriamente iha Dili, ha’u hakarak hatete iha ne’e, iha Dili ho totál 23.244 uma kain mak hetan. Bazeia ba dadus sira ne’ebé mak fó sai husi mídia katak iha suku balu iha Dili laran ne’e maiora ke seidauk halo instalasaun, ne’e ha’i dezmente hanesan tékniku ne’e laloos”, dehan Asesór ba Planu Programa no Forsa Traballu MAPKomS, Graciano Pires dos Santos, ba www.tempotimor.com iha gabinte MAPKomS, seta (28/01).

Tanba instalasaun ne’ebé mak kompaña Dili Eternal Innovation Information halo iha Munisípiu Dili, ne’e kuaze tékniku sira monta hotu ona kada uma-kain.

Iha suku Fatuhada ne’e benefisiáriu uma-kain hamutuk 1.402 mak asesu ba instalasaun ne’e, maibé iha informasaun balun husi Autoridade lokál sira katak família balun la satisfas kanal ne’ebé oferese tanba maioria xina nian tanba ne’e sira deside fó fila Set top Box ba rai iha sede suku tanba sira ho razaun sira iha televizaun ETO, K-vision, Indo-vision.

Ba Suku Vilaverde, tuir loloos uma-ka’in 1.335 mak atu asesu, maibé iha beifisiáriu 23 husi Aldeia Lemorai iha Suku Vilaverde mak la ba foti, tanba ne’e tékniku sira seidauk bele monta.

Bainhira monta STB ne’e, presiza iha uma na’in-ida mak reprezenta atu foti sira-nia sasán depois tékniku sira akompaña atubele monta.

Nune’e mós iha problema ida mosu iha Aldeia Makoko Mate iha Suku Bekora, dehan seidauk monta, maibé tékniku sira husi kompanã tun ba monitoriza no identifika informasaun husi populasaun rasik mak hatete, sira-nia instala hotu ona no hela ida-rua mak seidauk tanba momentu ne’e tékniku sira tun ba uma mamuk.

Maibé iha mídia balun fó sai, katak projetu instalasaun ne’e oferese mós ba Manatutu, ida ne’e parte MAPKomS dezemente ne’e laloos, tanba Manatutu agora dadauk seidauk iha tore transmitor, no seidauk bele halo instalasaun ba ne’ebá. 

Tanba ne’e mídia sira ne’ebé publika dadus no informasaun hodi halo espekulasaun iha públiku, mak parte MAPKomS deside sei prepara diretu de resposta ida tuir prosedimentu ne’ebé sei fó sai iha tempu badak.

Enkuantu Governu Xina oferese Set Top Box ba Timor-Leste hamutuk 31.500 STB, no iha faze dahuluk sei instala uluk 30.000, iha Munisípiu Dili, Likisá, Postu Administrative Kailaku, Munisípiu Ermera, Postu Administrativu Laulara, Munisipiu Aileu, nomós Postu Administrativu Kailaku, Munisípiu Bobonaro.

Projetu instalasaun STB ba faze dahuluk ne’ebé mak lidera husi Kompaña Dili Eternal Innovation Information, ne’e hahu iha 2019 no instala iha 2021 to’o fulan-abril 2022.

Projetu instalasaun Set Top Box ne’e nu’udar komponente ki’ik ida husi projetu Dijitál Teresteriál Multimedia (DTMB), tanba iha buat rua ne’e importante loos mak Hardware installation, no software installation.

Kona-ba Hardware installation ne’e atu halo instalasaun ida fíziku, no software installation ne’e sensitivu oituan, tanba iha ne’ebá sei tau ema nia naran, númeru telefone buat hotu iha ne’ebá, no ida ne’e Governu labele bosok, tanba ida ne’e sei iha SERVER ida iha RTTL.ep, atubele kontrola. (*)