"Ami halo konvesaun nasionál ida ohin, atu hola desizaun ikus, ba Kandidatu na'in-rua ne'ebé mak aprezenta ona sira-ninia vontade hakarak ninian atu sai kandidatu, Partidu Demokrátiku nian ba Eleisaun Prezidensiál”, dehan Sekretáriu Jerál PD, António da Conceição "Kalohan" iha Salaun Leo-kase, Rai-kotu, sábadu (22/01).
Ba kandidatura rua ne'e, konsellu superior sira iha Partidu Demokrátiku laiha poder atu deside, tanba dalan atu deside mak liuhusi konvensaun nasionál.
Partidu Demokrátiku deside uza meiu halo konvensaun nasionál nune'e bele hili entre kandidatura na’in-rua ne'e, tenke iha ida mak kandidata-an ba PR períodu 2022-2027.
Tanba entre kandidatu na'in-rua ne'e mesak ema importante hotu iha Partidu nia laran, ne’ebé mak aprezenta ona sira-ninia vontade atu sai kandidatu ba iha eleisaun Prezidente Repúblika.
"Entre sira na'in-rua ne'e, ida orsida ami sei deside, e ami hanoin ninia rezultadu orsida sei mai”, hatete nia.
Iha konvensaun nasionál ne'e, hetan partisiasaun másimu husi delegadu no estrutura Partidu nian, hahú husi nasionál no munisípiu, hamutuk 409, ne’ebé mak sei hola desizaun ba kandidatura nasionál PD nian. (*)