“Husu ba Ministériu Agrikuktura no Peska atu hari’i laboratóriu nasionál ba check no teste sampel husi produtu ai-hán, no líkidu hotu ne'ebé tama husi rai liur mai”, dehan Deputadu Bankada KHUNTO, António Verdial iha plenária PN, tersa (18/01).
Tanba durante ne'e, Governu laiha fasilidade laboratóriu atu check kualidade ai-hán husi rai liur nomós iha rai laran.
Bankada KHUNTO haree asunte ne'e perigu oituan, bainhira laiha laboratóriu atu kontrola ai-hán sira, sei fó implikasaun diretamente ba sosiedade no jeralmente ba populasaun tomak nia saúde.
Tanba ne'e husu ba Governu buka meiu hodi sosa ekipamentu ida ne'e, liuhusi alokasaun Orsamentu Jeral Estadu (OJE) ne’ebé mak hetan ona aprovasun iha Parlamentu Nasionál.
Deputada Bankada Partidu Demokrátiku (PD), Elvina de Sousa hatete, nia parte sekunda saida mak deputadu sira ko'alia relasiona ho laboratóriu nasionál.
Tanba Timor-Leste depende maka’as ba produtu importadu husi rai liur, ne’ebé presiza duni laboratóriu hodi halo teste.
“Durante ne'e ita hatene konsumu de’it, maibé ita la hatene katak ai-hán sira ne'e sei di'ak hela ka la'e?, dala ruma sasán sira ne'e liu ona prazu maibé ita la hatene tanba laiha laboratóriu”, esplika nia. (*)