Tempotimor (Dili)-Deputadu Bankada Congresso Nacionál de Reconstrução de Timor (CNRT) iha Parlamentu Nasionál (PN) hahú kritika Prezidente Repúblika (PR), Francisco Guterres ‘Lú Olo’, re-kandidata-an hodi kompete eleisaun Prezidensial iha loron 19 fulan-marsu 2022, tanba ladun di’ak.

Vise Xefe Bankada CNRT, Patrocino Fernandes, hatete, deklarasaun ne’ebé halo ladun étika tanba asume hela kargu Prezidente Repúblika maibé mobiliza militante hodi deklara re-kandidatura.

"Ita sei Prezidente Repúblika, mais depois hanesan halo ona antesipadamente kampaña eleitorál. Ne'e ami sente hanesan ladun naran sá, mais ida hanesan ne'e husi parte étika polítika ladun di'ak", dehan nia iha plenária PN, tersa (18/01).

Tanba ne'e, diretu Prezidente Repúblika atu anúnsia ninia deklarasaun kona-ba ninia kandidatu ba públiku, nomós halo mobilizasaun boot, maibé haree ba étika polítika ne'ebé ladun di'ak.

Prezidente Repúblika Francisco Guterres ‘Lú Olo’ ofisialmente anunsia ona ninia kandidatura ba Prezidente Repúblika períodu 2022-2027 ba públiku, iha Igreja Imaculada Conseição Ermera, domingu (16/01). (*)