“Ba prezidente mós ha’u ba ona vida sivíl, la ba prezidente mós ha’u ba ona vida sivíl, iha tempu badak ha'u sei ba ona vida sivil”, dehan Jenerál Lere iha Polisia Militár, Kintal Ki’ik, segunda (17/01).

Tanba Lere prontu ona kandidata-an ba Prezidente Repúblika enkuantu laiha impedimentu ruma relasiona sei bele realiza objetivu.

"Ha'u deklara ona katak ha'u prontu kandidata-an, se no kazu laiha impedimentu iha ha'u-nia objetivu ne'e, porque agora ne'e hothotu interese polítiku, sira ne'e hotu buikota malu”, hatete nia.

Maibé Prezidente Repúblika, ida ne'e mak nu’udar kareira ikus, bainhira laiha manobra polítika iha prosesu sira ba eleisaun prezidensiál ne’ebé sei hala’o iha loron 19 Marsu 2022.

Bainhira hala’o fali vida polítika mós sei defende nafatin forsa armada nia interese no bem estar.

"Ha'u fiar katak sé de’it mak mai troka ha'u-nia fatin mós sei kontinua nafatin sá di’ak mak durante ne’e ha'u halo ba instituisaun defeza nasionál ne’e ba oin nafatin, Komandante atu komanda, komandante atu garante, komandante atu hadomi la’ós atu hasoru problema de’it”, afirma Lere.

Maibé husu ba forsa sira atu lalika mete polítika, klaru katak seidauk iha lei atu forsa sira labele ba vota maibé tenke mantein nafatin katak to’o eleisaun mak ida-idak ba vota ho nia konsiénsia rasik. (*)