Login to your account

Username *
Password *
Remember Me

Lú Olo Ofisialmente Deklara Re-kandidata-an ba PR 2022-2027

Kandidatura Prezidente Repúblika, Francisco Guteres’Lú Olo’, anunsia kandidatu, iha Ermera, domingu (16/01). Kandidatura Prezidente Repúblika, Francisco Guteres’Lú Olo’, anunsia kandidatu, iha Ermera, domingu (16/01). Foto Tempo Timor

Tempotimor (Ermera)-Prezidente Repúblika (PR), Francisco Guterres 'Lú Olo' ofisialmente deklara, sei re-kandidata nia-an ba Prezidente Repúblika períodu 2022-2027.

"Ohin, ho imi hotu nia forsa, mak ha’u deklara ba Povu tomak katak, ha’u sei re-kandidata ofisialmente iha Tribunal Rekursu ba Prezidente Repúblika ba períodu 2022-2027", dehan Lú Olo iha anunsiu Kandidatura husi Kandidatu Francisco Guterres ‘Lú Olo’ iha Parókia Imaculada Conceição Ermera Tuan, domingu (16/01).

Tanba ne’e, mai iha fatin istóriku ida, iha fatin lulik ida ne’e, iha Ermera, asu’ain sira halibur beibeik ho Komandante Nino Konis Santana, Chefe do Conselho Executivo da Luta Frente Armada no Sekretáriu Komisaun Diretiva FRETILIN.

Ho Ermera-oan sira-nia apoiu tomak mak Komandante Nino Konis Santana organiza  no lidera  luta, ho barani no determinasaun, to’o loron nia mate, iha 11 Marsu 1998, iha Mirtutu, Ermera.  

"Ohin, iha fatin lulik ida ne’e, mak ha’u simu konfiansa husi kompatriota liu rihun atus ida rua nulu resin, atu ha’u, sai dala ida-tan, Prezidente Repúblika ba Timor-Leste no ba Povu tomak", katak Xefe Estadu.

Konfiansa ne’e mai husi veteranus, jerasaun patriota, husi katuas-ferik to'o Juventudi Loriku asuwain tomak,  mai husi natar-nain no to'os-na’in sira, produtór kafé, traballadór iha sektór públiku no privadu, estudante sira,  intelektuál no akadémiku sira, husi munsípiu hothotu no RAEOA.

"Ha’u sente onradu tebes ho konfiansa  maluk sira  fó mai ha’u. Konfiansa ida mai husi ita-nia Povu soberanu, konfiansa ida ne’ebé ha’u asumi hanesan kompromisu boot ida mai ha’u rasik atu re-kandidata ba Prezidente Repúblika 2022-2027", hatete Lú Olo.

Ho ida ne’e, promete hamoris filafali, misaun Nino Konis Santana nian ho nia liafuan, fó-sai iha 1997, “Timor-Leste la iha Loro Sa'e, la iha Loro Monu!  Povu ida de’it, Pátria ida de’it”.

Tanba kompromisu fó-an tomak ba Povu no Pátria mak "Ha’u uluk kandidata ba Prezidente Repúblika iha tinan 2017, ho apoiu tomak husi FRETILIN".

Nune'e manán iha primeira volta tanba maioria Povu fó fiar, atu sai Prezidente Repúblika.

"Nu’udar Prezidente Repúblika, ha’u hasoru dezafiu no difikuldadi oioin maibé ho ulun malirin no matenek Povu tomak nian, ita moris hakmatek to’o ohin loron. Liuhusi esperiénsia sira ne’e mak ha’u aprende no hatene di’akliu tan oinsá sai Prezidente ba Povu tomak", esplika nia.

Timor-Leste presiza nafatin Prezidente Repúblika ida ne’ebé iha koñesimentu klean kona-ba relasaun internasionál, tanba liuhusi parseria bilaterál no multilaterál ho rai sira seluk, mak Timor bele hala’o dezenvolvimentu sósiu-ekonómiku no hametin  soberania nasionál.

"Ha’u sei kandidata dala ida-tan atu sai Prezidente Repúblika ba Timor-Leste no ba Povu Tomak, ho kompromisu katak, ha’u sei barani nafatin foti desizaun ho kbi’it ne’ebé Konstituisaun RDTL fó mai ha’u, nu’udar Prezidente Repúblika, no tuir ha’u-nia konxiénsia rasik", hatutan Lú Olo.

Tanba Konstituisaun RDTL, no Lei inan, fó dalan ba Prezidente Repúblika hala’o mandatu daruak, atu hamutuk la’o ba oin.

Enkuantu, Lú Olo sei kaer metin Konstituisaun RDTL no lei sira, tanba instrumentu sira ne’e mak fó kbi’it mai nia, nu’udar Prezidente Repúblika, atu kontribui ba hametin Estadu Timor-Leste no lori moris di’ak ba Povu tomak.

"Ohin ha’u kompromete dala ida tan atu sai Prezidente hothotu nian no ba ema hotu, iha mandatu 2022-2027. Sei la hasees ema ida, feto ka mane, sei la haliis ba grupu ne’ebé de’it", afirma nia.

Ho apoiu tomak husi maun-bin-alin sira hotu, Presidente Lú Olo fiar katak, sei manán dala-ida tan, iha primeira volta eleisaun prezidensiál.

"Ha’u fiar katak maioria Povu sei hamutuk nafatin ho ha’u iha eleisaun tuir mai", katak Xefe Estadu. (*)

Rate this item
(0 votes)
Last modified on Sunday, 16 January 2022 17:59
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter