"Konvensaun tolu ne'e mak ida ko’alia kona-ba oinsá fó formasaun profesionál ba ita-nia sidadaun sira, e seluk iha padraun atubele kontrolu Ró sira-nia movimentu mai iha ita-nia tasi, e seluk fali mak oinsá atu halo salva guarda, ba ita-nia marineiru sira, bainhira sira halo movimentu iha tasi laran, hodi asegura ambiente tasi ninian”, dehan Julião iha PN, sesta (14/01).
Ba Konvensaun tolu ne'e, dadauk MNEK ho Komisaun B PN halo ona audénsia hodi aprezenta no justifika ba deputadu sira kona-ba razaun fundamental balun nomós preparasaun kondisaun ba situasaun ne'e.
"Ha’u hanoin kala legal haat ne'ebe ita iha entre Ministériu Negósiu Estranjeiru ho Ministériu relavante sira ita iha, agora so ita tenke ratifika tiha konvensaun ne'e mak foin bele aplika ita-nia regra legal ne’ebé mak ita preparadu, no ita iha legal 14 ne’ebé mak iha ona lei para depois tempu badak mak ita avansa filafali mai iha PN para hetan aprovasaun”, esplika nia.
Dadauk Governu esforsu hela atu, konvensaun Internasionál tolu importante ne'e bele hetan ratifikasaun husi Parlamentu Nasionál iha tempu badak.
Prezidente Komisaun B Trata asuntu Negósiu Estranjeiru, Defeza no Seguransa iha Parlamentu Nasionál (PN), José Agustinho Siqueira "Somotxo" hatete, konvensaun tolu ne'e sei kompara ba parte ekonomika di’ak, bainhira Timor-Leste ratifika ona konvensaun ne'e mak ema ne’ebé tama mai Timor-Leste laiha kondisaun, sei selu multa.
"Ne’ebé ida ne'e parte ekonómika di'ak tanba ejizensia ne'e sei boot liuhusi konvensaun ba Ró sira ne’ebé atu tama mai iha ne'e”, dehan nia.
Maibé konvensaun ne'e sai hanesan responsabilidade boot Governu, tanba bainhira Timor-Leste mós la kumpre konvensaun ne'e, komunidade Internasionál sira ne’ebé kumpre hela konvensaun ne'e, bele kondena filafali Timor-Leste, no bele mós husu tenke selu multa.
Purtantu Konvensaun Internasionál tolu ne'e, Ministériu Negósiu Estranjeiru no Kooperasaun (MNEK), mak loke dalan, no Ministériu Transporte no Komunikasaun (MTK), Ministériu Defeza (MD), Sekretáriu Estadu Ambiénte (SEA) mak sei responsabiliza. (*)