“Ha’u hakarak hatete ida ne’e, jerasaun 1975 Maun boot Kay Rala Xanana Gusmão, José Ramos Horta, Rogerio Tiago Lobato, José Luis Guterres no Abilio Araújo, ami sira ne’ebé mak hakarak servisu hamutuk atu hadi’a rai ida ne’e", deklara Eis Ministru Interior Governu Dahuluk, Rogerio Tiago Lobato iha toma pose ba estrutura Nasionál no Munisípiu ba apoiu Ramos Horta ho Xanana Gusmão, iha salaun Katedral Bebora, sesta (14/01).

Tanba durante ne’e, povu moris iha terus kleur ona no povu simu pasiénsia demais ona, tanba ne'e tenke muda situasaun dezenvolvimentu Timor-Leste.

“Moris iha susar ne’e duni, ita labele husik de’it ita-nia povu moris ho liafuan pasiénsia labele, to’o ona, to’o ona, balun pasiénsia to’o mate tán la hetan benefisiu ida ba independénsia ida ne’e", afirma nia.

Ho esperansa importante maibé labele moris iha esperansa de’it tanba esperansa tinan barak ona. Hanesan esperansa durante tinan 24 atu ukun rasik-an, ne’ebé tempu hotu hanoin atu lori buat di’ak maibé la lori duni buat di’ak tanba povu sei terus hela.

Maibé ondra boot jerasaun 1975 mesmu maun boot Xanana Gusmão la marka prezensa iha seremónia ne’e, maibé hamutuk nafatin atu lori esperasaun foun ba Timoroan.

“Ha’u lakohi dadalia barak ha’u hakarak hatete de’it katak, Timor-Leste tenke muda. Ami sira ne’ebé hamutuk ho maun José Ramos Horta, Maun Xanana. Maske erói sira mate ona, maibé sira-nia espíritu sei nafatin hamutuk atu fó forsa mai hodi muda situasaun Timor-Leste, tanba sira sei tulun atu muda situasaun difísil ida ne’e", reafirma nia.

Tanba iha tempu luta hasoru nasaun Indonézia lori prosesu ida ne’ebé naruk tebes, nafatin sei moris, mó sei la permite Timor-Leste, kontinua nafatin hanesan ne’e, maibé tenke muda demokrasia, tenke la’o ba oin.

“Ita simu ita hambrik hodi la’o, tenke la’o ba oin nafatin ami hamutuk, ami sei la husik malu atu hatudu dalan loos ba jerasaun ne’ebé durante ami tenke hadi’a rai ida ne’e", informa nia.

Bainhira sira taka matan, atu intrega rai ida ne’ebé di'ak ba jerasaun foun sira ne’ebé mak tuir mai no jerasaun ne’ebé tuir tenke iha responsabilidade. (*)