"Ohin loron ami iha família boot no fileira boot hodi hamutuk Forsa Polítika Aleadu Defende Direitu Demokrátiku iha Timor-Leste deside deklara no konfirma katak, fó apoiu vitoria determinante no hakarak lori duni maun boot Kay Rala Xanana Gusmão no Dr. José Manuel Ramos Horta ba Palasiu Prezidensial Ai-tarak laran. maun boot Kay Rala Xanana Gusmão ba Palásiu Governu, iha eleisaun prezidensiál 2022 no eleisaun Parlamentár iha tinan 2023 ninian”, dehan Portavoz Vise Prezidente JFP-ADDD, Cornelio Barros iha salaun Katedral Bebora, sesta (14/01).
Junta forsa polítika aleadu defende direitu demokrátiku hari’i no nia konsiénsia halo tuir nu’udar sidadaun ne’ebé responsavél polítika, responsavél partidaria nune’e determinante atu kontinua tane aas valór ukun rasik-an no prinsípiu iha Estadu direitu demokrátiku.
"Junta forsa politika aleadu direitu demokratiku rekoñese katak, durante tinan 4 (haat) ita-nia povu enfreta dezafiu sira ne’ebé efeta husi ita-nia Estadu no servisu ofende konstitusionál sira no minimiza sidadaun públika ida ne’e", afirma nia.
Tanba iha tempu surtu covid-19, Estadu halo serka sanitária no konfinamentu obrigatóriu limite no halo perturbasaun ba sidadaun no situasaun ekonomia no hamete progresimentu vontade povu.
Nune'e Eis Presidente Repúblika, José Ramos Horta, agradese apoiu konfiansa ne'ebé la'ós ohin de'it, iha fulan hira liuba no tinan rua mai ona timoroan rihun ba rihun organiza nia movimentu no hanesan grupu seluk tan ne'ebé halo parte iha movimentu sira.
"Portantu ha'u halo mensajen, sira rasik halo komentáriu iha ha'u-nia Facebook e agradese ba konfiansa ida ne'e, ne'e ondra boot ida todan tebtbes, e ema ne'ebé politiuk hanoin duni, tenke sukat didi'ak, iha kbi’it iha vontade, iha motivasaun, iha matenek, iha esperiénsia para simu todan", dehan Horta.
Maibé to’o agora seidauk iha desizaun atubele kandidata-an ba Prezidente Repúblika, tanba hein prezidente anunsia promulga lei kalendáriu eleitorál nian no marka data eleisaun.
"Portantu to'o agora ha'u seidauk halo desizaun ha'u atu kandidatu-an. Ha'u sempre prontu ba kualker todan, reponsabilidade, Governu, ke nasaun, ke prezidente, ke Estadu, ke povu presiza hakarak portantu la'ós de'it atu ba Prezidente mais konforme iha funsaun seluk tan”, afirma nia. (*)
